Qazaqstan shetelden 640 mlrd teńge qaryz almaq. Senat tóraǵasy ekonomıkalyq ósimdi qamtý úshin ishki resýrstardy izdeý qajettigin aıtty , dep habarlaıdy "Adyrna" ulttyq portaly turkystan.kz-ke siltep.
Máýlen Áshimbaevtyń sózinshe, bizdiń ekonomıka munaıdyń baǵasyna baılanǵan. Bul – durys emes. Onyń oıynsha, bul óz kezeginde bıýdjet tapshylyǵyna áser etedi. Al bıýdjet tapshylyǵy saldarynan syrttan qaryz alýǵa týra keletin kórinedi.
«Bir jaǵynan, bankter ekonomıkany nesıelendirmeıdi nemese joǵary paıyzdyq mólsherlememen nesıe bermeıdi. Ekinshi jaǵynan, biz halyqtyń aqshasy arqyly shaǵyn orta bıznes úshin paıyzdyq mólsherlemeni sýbsıdııalaımyz. Tek «Damý» qorynyń jelisi boıynsha bıyl 170 mıllıard teńge bólemiz. Osylaısha, biz joǵary paıyzdyq mólsherlemeni saqtaı otyryp, sony tómendetýge taǵy bıýdjetten jumsap otyrmyz. Álbette, bul memlekettik organdarǵa da, bankterge de qolaıly. Óıtkeni táýekel men jaýapkershilik az.
Bıýdjet tapshylyǵy 3,3% deńgeıinde qalyp otyr. Ony toltyrý úshin syrttan 640 mlrd teńge alynady. Al ishki kózder 780 mlrd-qa tómendetiledi. Sonda bir jyl ishinde tapshylyq bolmashy kúıde ǵana jabylyp otyr. Biraq bizde qarajat joq dep aıtý durys emes, ishki resýrstar bar», – dedi Senat tóraǵasy Máýlen Áshimbaev.
"Adyrna" ulttyq portaly
