Almatyda bıznesmen, «Qaırat» fýtbol klýby baqylaý keńesiniń tóraǵasy Qaırat Boranbaev ustaldy, dep habarlaıdy “Adyrna” ulttyq portaly QazTAG derekkózine silteme jasap.
«Boranbaevty Almatyda Qarjy monıtorıngi agenttiginiń (QQA) qyzmetkerleri ustady. Onymen Almaty fılıaly emes, AQM Astanadaǵy bas keńsesindegi adamdar «jumys isteýde». Qazir Boranbaev tergeý ızolıatorynda. Jaqyn kúnderi Almatyda tergeý boıynsha is-sharalar ótedi», — dep jazdy agenttik.
Aıta keteıik, Qaırat Boranbaev – Nursultan Nazarbaevtyń qyzy Darıǵa Nazarbaevanyń burynǵy kelini Álıma Boranbaevanyń ákesi. Boranbaevtyń qyzy Alıma Boranbaeva Darıǵanyń uly Aısultan Nazarbaevqa (2020 jyly qaıtys bolǵan) turmysqa shyqqan. Keıin Aısultan men Alıma ajyrasyp ketken.
Sondaı-aq, Forbes jýrnaly ótken jyly Qazaqstannyń eń baı adamdarynyń reıtıngisinde Boranbaevtyń baılyǵyn 590 mıllıon dollarǵa baǵalaǵan.
Olıgarhtyń ustalǵany týraly ázirshe tek BAQ aqparat taratty, al resmı organdar únsiz.
“Adyrna” ulttyq portaly
