Qazirgi tańda jastardy áskerı qyzmetke daıarlaýmen shuǵyldanatyn mekemelermen jaýapty tulǵalar, bolashaq sarbazdardy Qazaqstan Respýblıkasynyń áskerı bólimderinde tabysty qyzmet etýge daıarlaýǵa asa jaýapkershilikpen qaraýda. Elimizdiń qorǵanys qabiletin qamtamasyz etý - búkilhalyqtyq is jáne ol úshin jastardyń boıynda óz eline degen patrıottyq sezim, Otanyna degen súıispenshilik, elimizdiń qaýipsizdigi men qarqyndy damýyna degen jaýapkershilikti seziný sekildi qasıetterdi qalyptastyra bilý jaýapty da, mańyzdy is-sharalardyń biri bolmaq.
Bolashaq sarbazdardy elimizdiń Qarýly Kúshterinde ózderiniń azamattyq boryshyn óteýge daıyndaýda mektep ujymynyń atqaratyn róli ushan teńiz. Bul turǵyda sanaly ǵumyryn ustazdyq jolyna arnaǵan bilikti maman zapastaǵy podpolkovnık Qusaıynov Satyvaldy Toqtarbaıulynyń jaýapty qyzmetin tilge tıek etsek artyq bolmas.
Shákirtsiz ustaz tul demekshi, shákirtteri bıik belesterdi baǵyndyryp, joǵary jetistikterge jetip jatsa ustaz úshin odan artyq qandaı baqyt kerek. Osy maksatta tynbaı eńbek etip, ózine júktelgen jaýapty mindetti abyroıly atqaryp júrgen S.Qusaıynov qyzmet ete júrip talaı shákirt tárbıeledi. Solardyń biri QR UQK Shekara akademııasy 3-oqý dıvızıonynyń kýrsanty Zaderı Devıd Romanovıch.
Almatydaǵy №5 mektepte sabaq berip júrgen bilikti maman, sol jerde júrip 10-synyp oqýshysy D.Zaderıdi birneshe ret áskerı-patrıottyq klýbtarǵa jáne áskerı joǵary oqý oryndarynda uıymdastyrǵan sharalarǵa aparyp, onyń áskerı salaǵa degen qyzyǵýshylyǵyn arttyrǵan.. Keıinnen mektepti oıdaǵydaı aıaqtaǵan Devıd Romanovıch kóp oılanbastan QR UQK Shekara akademııasyna oqýǵa tapsyrǵan. Búginde, oqýshysyn maqtan tutqan mektep ujymy, shekarashy kýrsanttyń sýretin qurmet taqtasyna ilipti.
«Ustazdyq etken jalyqpas úıretýden balaǵa», - dep Abaı atamyz aıtqandaı Satyvaldy Toqtarbaıuly, búginde Bostandyq aýdanyna qarasty Ermensaı aýylyndaǵy NGS jańa býyn aqyly mektebiniń alǵashqy áskerı jáne tehnologııalyq daıyndyq pániniń muǵalimi bolyp eńbek etip júr.
Jaqynda biz sóz etip otyrǵan bilikti maman ózi qyzmet etip júrgen NGS jańa býyn aqyly mektebiniń 50-ge jýyq 10-synyptyń oqýshylaryn Shekara akademııasyna ákelip, akademııanyń tynys-tirshiligimen tanystyrdy. Shara barysynda oqýshylar akademııanyń arnaıy taktıkalyq fakýltetine qarasty jalpy áskerı pánder jáne atys daıyndyǵy kafedralaryn aralady. Onda tájirıbeli shekarashy, bilikti ofıerler oqýshylarǵa birneshe mınýt dáris oqyp, kafedranyń shyǵý tarıhyna qatysty derekti fılm kórsetti. Ásirese, atys daıyndyǵy kafedrasynda oqýshylardyń qyzyǵýshylyǵy artty. Munda shekarashy ofıerler AK-74 avtomaty men Makarov tapanshasyn belgilengen normatıvter boıynsha shashyp, qaıta jınady. Eń qyzyǵy, jańaǵy buzyp jınaǵan kánigi avtomat pen tapanshanyń elektrondy nusqasynan nysana kózdegen oqýshylar ózderiniń mergendikterin synap, nysanaǵa dál tıgizýge tyrsty. Sodan keıin 3-oqý dıvızıonyna kirip, kýrsanttardyń kazarmasyn aralap kórdi. Sol sátte kýrsant Zaderı Devıd Romanovıch oqýshylar arasyndaǵy ustazyn kórip, ony bas sala qushaqtap, qýanyshtan kózine jas aldy. Óz kezeginde shákirtin oqýshylarǵa maqtana tanystyrǵan S.Qusaıynov onyń aldaǵy qyzmetine sáttilik tiledi.
«Jalpy bilim berý mekemelerindegi «Alǵashqy áskerı daıyndyq» páni men patrıottyq tárbıe jumystarynyń mańyzy jyl saıyn artyp keledi. Jastardy áskerı qyzmetke daıarlaýda alǵashqy áskerı daıyndyq bólimderi oqýshylardy patrıottyq rýhta tárbıeleý úshin kóptegen ıgi is sharalardy júzege asyrdy. Atap aıtqanda, oqýshylardy Almaty qalasy boıynsha uıymdastyrylǵan aýdandyq jáne qalalyq jarystarǵa qatystyryp, talaı ret júldeli oryndardy ıelendik. Sonymen qatar, Almaty qalasy boıynsha alǵashqy áskerı daıyndyqtan beretin oqytýshylar arasynda talapqa saı jabdyqtaǵan eń úzdik kabınet nomınaııasyn jeńip aldyq. Osy pándi oqytý barysynda, oqýshylardyń teorııalyq bilimderi men tájirıbelik daǵdylary shyńdalyp, áskerı-patrıottyq jarystarǵa qatysý arqyly áskerı qyzmetke degen qyzyǵýshylyǵy artady. Onyń ústine, áskerı joǵary oqý oryndaryna jıi-jıi baryp, tyǵyz qarym-qatynas ornatqannyń arqasynda aldaǵy ómirin áskerı salamen baılanystyrǵysy keletin oqýshylardyń qatary jyldan-jylǵa kóbeıip keledi», -deıdi ol bizge bergen suqbatynda.
Myń ret estigenshe, bir ret kórgen artyq demekshi, osyndaı sharalar barysynda jastar men jasóspirimderdiń áskerı ómirge degen qyzyǵýshylyǵy oıanatyny anyq. Sondyqtan bolý kerek biz sóz etip otyrǵan Satyvaldy Toqtarbaıuly oqýshylardy tájirıbelik sabaqtarǵa aralastyrǵandy úrdiske aınaldyrǵan. Sonyń nátıjesinde, qasterli shekarashy mamandyǵyn tańdaıtyn oqýshylar qatary ósýde.
Iá, aıtsa aıtqandaı-aq shynynda da, jelkildep ósip kele jatqan jastarsyz el bolashaǵyn kóz aldyńa elestetý tipti de múmkin emes. Áskerı qatal tártipti, adaldyqty, joldastyq sezimdi osyndaı is-sharalardan boıyna sińirip ósken urpaq ómirlik jolynda qandaı da bolsyn qıyndyqtardy ońaı eńseredi. Olaı bolsa, Otan qorǵaý - naǵyz erdiń isi! Otanǵa qyzmet –abyroıly mindeti.
Janat JABYRBEKOV,
QR UQK Shekara akademııasynyń
baspasóz hatshysy
