Ázerbaıjan prezıdenti Ilham Álıev TMD elderi basshylarynyń beıresmı sammıtine qatysý úshin Sankt-Peterbýrgke attanǵan kezde, áýe apaty bolǵany týraly habar berilip, memleket basshysy keri qaıtty, dep habarlaıdy "Adyrna" ulttyq portaly.
Geıdar Álıev atyndaǵy halyqaralyq áýejaıǵa ushyp kelgennen keıin, Ilham Álıev osy oqıǵaǵa baılanysty keńes ótkizdi.
Keńes barysynda Ázerbaıjan prezıdenti apattan qaza bolǵandarǵa kóńil aıtyp, bul tragedııanyń Ázerbaıjan halqyn úlken qasiretke dýshar etkenin atap ótti.
"Búgin tańerteń men Bakýdan Sankt-Peterbýrgke TMD sammıtine qatysý úshin ushqanymda, maǵan osy apat týraly habar berildi. Men dereý tapsyrma berip, ushaq Bakýǵa qaıtyp oraldy. Áli ushaqta bolǵanymda, men tıisti nusqaýlar berip, premer-mınıstrmen sóılestim, onyń basshylyǵymen komıssııa quryldy. Sonymen qatar, apat bolǵan Aktaý qalasyna Ázerbaıjan delegaııasy jiberildi. Tıisti tapsyrma berildi" - dedi ol.
Onyń aıtýynsha, apattyń naqty sebebin aıtýǵa áli erte.
"Komıssııanyń mindeti – apattyń sebebi men barlyq málimetterin tolyq zerttep, meni jáne Ázerbaıjan jurtshylyǵyn aqparattandyrý. Apat sátteri buqaralyq aqparat quraldarynda jáne áleýmettik jelilerde jarııalandy. Árkim bul sátterdi kóre alady. Biraq apattyń naqty sebepteri bizge belgisiz. Ár túrli boljamdar bar. Meniń oıymsha, áli osy másele týraly aıtý erte. Bul másele tolyq tergelýi kerek. Bas prokýratýra qylmystyq is qozǵady, jáne Ázerbaıjan jurtshylyǵy komıssııa jumysynyń nátıjeleri men qylmystyq istiń barysy týraly únemi habardar bolyp otyrady" - dedi ol.
