22 aqpanda tergeý soty Qazaqstannyń burynǵy qorǵanys mınıstri Murat Bektanovqa qatysty eki aı merzimge qamaýǵa alý túrindegi bultartpaý sharasyna sankııa berdi,dep habarlaıdy "Adyrna" ulttyq portaly.
Bektanov 20 aqpanda ustaldy. Ol qańtar oqıǵasy kezindegi «áreketsizdikteri» úshin aıyptalyp otyr. Murat Bektanov Qazaqstan prezıdenti Qasym-Jomart Toqaevtyń jarlyǵymen 2021 jyldyń tamyzynda Jambyl oblysyndaǵy áskerı qoımada bolǵan jarylystan keıin Qorǵanys mınıstri bolyp taǵaıyndaldy. Bektanov Qorǵanys mınıstrligin tórt aı boıy basqardy.
Bıylǵy jyldyń 19 qańtarynda Toqaev Bektanovty qańtar oqıǵasy kezinde «qolbasshylyq qasıetin kórsetpedi» dep qyzmetinen bosatty. Sol kúni parlamenttiń tómengi palatasy burynǵy prezıdent Nursultan Nazarbaevtyń Qazaqstan Qaýipsizdik Keńesi men Qazaqstan halqy Assambleıasyn ómir boıyna tóraǵalyq etý quqyǵyn alyp tastaıtyn zańnamaǵa eks-post-fakto túzetýlerdi maquldady.
Mańǵystaý oblysynyń Jańaózen qalasynda qańtar aıynyń basynda suıytylǵan gaz baǵasynyń sharyqtaýynan týyndaǵan narazylyq sharalary eldiń basqa aımaqtaryna, Almaty sııaqty birqatar qalalarǵa tez taralyp, qantógiske ulasty. Resmı túrde 227 adam qaza tapty, onyń ishinde 19 qaýipsizdik qyzmetkeri ajal qushty.
Qańtardaǵy sherýshilerdiń narazylyǵy negizinen eks-prezıdent Nursultan Nazarbaevtyń saıası murasyna, tolyq jemqorlyq pen ádiletsizdikke qarsy boldy. Kópshilik Nazarbaev 2019 jyly otstavkaǵa ketip, prezıdenttik qyzmet onyń protegeti Qasym-Jomart Toqaevqa aýysqannan keıin de memlekettik apparatqa yqpalyn jalǵastyrǵanyn aıtty.
"Adyrna" ulttyq portaly
