Almaty oblysynda memlekettik qyzmettiń áleýetin arttyrý úshin 2018 jyly I.Jansúgirov atyndaǵy Jetisý ýnıversıtetimen eki jaqty memorandýmǵa qol qoıylyp, nátıjesinde «Jetisý» - «Memlekettik qyzmet mektebi» jumysyn bastaǵan edi. Búgin, atalmysh bastama qanatyn keńge jaıyp, órisi keńidi.
Qazaqstan Respýblıkasy memlekettik qyzmet isteri agenttiginiń Almaty oblysy boıynsha departamenti jobanyń jandanýy úshin, Oblystyq Ishki saıasat jáne bilim basqarmalarymen, sondaı-aq, QR Prezıdenti janyndaǵy Memlekettik basqarý Akademııasynyń aımaqtaǵy fılıalymen memorandýmǵa qol qoıdy.
Jańa baǵyt, jańa talap, ózge qoǵam. Bunyń barlyǵy memlekettik istegi ózgeristerdi talap etedi.
Bási áste joǵary, qyzmettegi talaby tym bıik salanyń sýyǵyna tońyp, otyna kúıetinder neken-saıaq. Olaı deýge negizde joq emes.
Qazaqstan Respýblıkasy memlekettik qyzmet isteri agenttiginiń Almaty oblysy boıynsha departamentiniń basshysy Lázzat Beısequlovanyń keltirgen derekterine súıensek, 2021 jyly Memlekettik qyzmetke turǵan 230 adamnyń 34-i bir jylǵa jeter-jetpes ýaqytta óz erikterimen jumystan ketken. Basty sebep, memlekettik qyzmetkerge qoıylar talap.
«Memlekettik qyzmetke kelip, basqa salada jumys jasaýdy qup kórip jatady. Sondaı-aq, jalaqynyń tómendigi jáne otbasylyq mán-jaılar. Bul jas kadrlardyń memlekettik qyzmetshilerdiń ıyǵyna túsetin talaptarǵa, shekteýlerge jáne jaýapkershilikke daıyn emestigin kórsetedi. Qazirgi zamanǵy memlekettik qyzmetshi stresske ornyqtylyq, bastamashyldyq, jaýapkershilik, parasattylyq, jedeldilik sııaqty quzyretterge ıe bolýy kerek, ıaǵnı básekege qabiletti bolýy tıis»,-deıdi Qazaqstan Respýblıkasy memlekettik qyzmet isteri agenttiginiń Almaty oblysy boıynsha departamentiniń basshysy Lázzat Beısequlova.
Departament basshysynyń atap ótken máseleleriniń sheshimin tabýdyń bir joly- "Jetisý" - "Memlekettik qyzmet mektebi" bolyp tabylady.
Memlekettik qyzmetke óziniń bolashaq ómiri men mansabyn memlekettik qyzmetpen baılanystyratyn adamdar kelýi tıis.
Óıtkeni, Memlekettik qyzmet-bul jaı jumys, emes-bul kásip. Sondyqtan, jastar Memlekettik qyzmet mektebin bitirip, onda memlekettik qyzmetshilerge qoıylatyn talaptardy ıgerip, shekteýler týraly túsinikti sanalaryna túıip kelýi tıis.
Osy turǵysynda, «Jetisý» – «Memlekettik qyzmet mektebiniń» jumysy orasan zor ról oınamaq.
Jalpy atalǵan jobanyń júzege asqanyna 3 jyldan asty. Osy ýaqytta 84 stýdent bilim alyp, onyń 50% - dan astamy memlekettik qyzmetke ornalasty.
Nátıjeli jumysty odan ári jalǵastyrý ońtaıly sheshim. Sol sebepti, ýaqyttyń jańa talaptaryna sáıkes, engizilgen ózgeristermen Departament, Memlekettik qyzmet akademııasynyń fılıaly, Bilim basqarmasy jáne oblystyń Ishki saıasat basqarmasy arasynda tórt jaqty memorandýmǵa aldaǵy úsh jyl birge jumys jasamaqqa qol qoıdy.
Endigi jumystyń sıpaty da ózgermek. Eger buryn mektep stýdentteri úshin sabaqtar I. Jansúgirov atyndaǵy ýnıversıtette ótken bolsa, budan bylaı sabaqtar QR Prezıdenti janyndaǵy Memlekettik basqarý akademııasynyń Almaty oblysy fılıalynyń ǵımaratynda ótedi, onda sapaly jáne tıimdi sabaqtardy ótkizý úshin barlyq qajettiliktermen jabdyqtalǵan.
"Jetisý" mektebiniń oqytýshylar quramy Akademııa fılıalynyń úzdik oqytýshylary men lektorlarynan quralǵan. Olar óz kezeginde tájirıbelerimen bólisip, memlekettik qyzmette baǵyn synaǵysy keletinin jastarǵa baǵyt-baǵdar beredi.
Oqý barysy teorııa men praktıkaǵa negizdeledi. Akademııa qabyrǵasynda bilim alǵandar aldaǵy tańda tájirıbe almasý úshin oblystaǵy memlekettik mekemelerden is-tájirıbeden ótedi.
Bul olarǵa tez beıimdelýge jáne halyqqa qyzmet etýge kirisýge múmkindik beredi.
”Adyrna” ulttyq portaly
