Baýyrjan Momyshuly 4 kún boıy jerlenbeı jatyp qalǵan. Bul týraly batyrdyń kelini, jazýshy Zeınep Ahmetova “Zeınep apanyń áńgimeleri” baǵdarlamasynda aıtyp berdi, dep habarlaıdy «Adyrna» tilshisi Caravan.kz medıa portalyna silteme jasap.
“Qazaqstannyń Reseıge óz erkimen qosylǵanynyń 250 jyldyǵy ótip jatqan kezde atam qaıtys boldy. Qosylsańdar qosylyńdar, men kettim degendeı.. Sonymenen atamyz 4 kún jerlenbeı jatyp qaldy. Óıtkeni, toıdyń kezi bolatyn. 250 jyldyq ótken kúnniń ertesine RSFSR ádebıeti men mádenıeti kúnderi bastaldy. Búkil orystar kóship keldi, ataqtylarynyń bári Almatyǵa keldi. Sondaı kezde atany shyǵaryp sala almady. Óıtkeni, halyq keledi, jınalady. Qudaı basqa salmasyn, áli kúnge deıin oılasam, júregim syzdap ketedi”, – dedi Zeınep Ahmetova.
“Bizdi aralastyrmaıdy, bizge ruqsat etpeıdi. Ol Sovet Odaǵynyń kezi. Qazir bolsa áı, ket ary deımiz ǵoı. Al ol kezde óıte almaısyń. Sóıtip tórtinshi kúni ǵana ata jerlendi. Birinshi Keńsaı dep atalatyn jerde joǵary jaǵyna tóbege ata jalǵyz qoıyldy”,- dedi jazýshy.
Al jerlengen kúni Almatynyń aýa raıy da tosyn minez tanytypty.
“Jerleıtin kezde áskerı adam bolǵan soń soldattar aspanǵa oq atty. Úsh márte. Sosyn atany jerge túsiretin kezde aspandy aıaq asty qara bul torlap, naızaǵaı oınap jaýyn jaýdy de ketti. Bireýler bul oq atqannan boldy deıdi. Al menińshe bul tabıǵatyń bir tylsym kúshi ma, Alla taǵalanyń atany osynsha kún jatqyzyp qorlaǵanyna keıigeni ma, renjigeni ma túsiný qıyn”,- dedi Zeınep Ahmetova.
Esterińizge sala keteıik, Baýyrjan Momyshuly 1982 jyldyń 10 maýsymynda 71 jasynda ómirden ótken bolatyn.
«Adyrna» ulttyq portaly
