اقمولا وبلىسىندا كوكتەمگى سۋ تاسقىنى سالدارىنان ونداعان ەلدى مەكەن زارداپ شەكتى. Ulysmedia.kz مالىمەتىنشە، وڭىردە 70-تەن استام تۇرعىن ءۇيدى سۋ باسىپ قالدى. قاۋىپتى جاعدايعا بايلانىستى كەي اۋدانداردا توتەنشە جاعداي جاريالانۋى مۇمكىن، دەپ حابارلايدى "ادىرنا" ۇلتتىق پورتالى.
توتەنشە جاعدايلار مينيسترلىگىنىڭ حابارلاۋىنشا، استراحان اۋدانىنىڭ جاڭاتۇرمىس، كولۋتون، ستارىي كولۋتون، ياگودنوە ەلدى مەكەندەرى مەن اتباسار اۋدانىنىڭ ا.قۇرمانوۆ اۋىلىندا 69 ءۇيدى سۋ باسقان. بۇلاندى اۋدانىنىڭ نوۆوبراتسكوە اۋىلىندا تاعى 29 اۋلا اۋماعى سۋ استىندا قالعان.
قاۋىپسىزدىك ماقساتىندا 383 ادام ەۆاكۋاتسيالاندى. ولاردىڭ 10-ى ۋاقىتشا ورنالاستىرۋ پۋنكتىلەرىنە جايعاستىرىلسا، 159 ادام تۋىستارىنىڭ ۇيىندە تۇرىپ جاتىر. قازىرگى ۋاقىتتا 214 ادام ۇيلەرىنە ورالعان.
سۋ تاسقىنى جول قوزعالىسىنا دا كەرى اسەرىن تيگىزدى. وبلىس اۋماعىنداعى 26 جول ۋچاسكەسىن سۋ شايىپ وتسە، 5 ۋچاسكە مۇلدە جارامسىز بولىپ قالعان. 14 ەلدى مەكەنگە كولىك قاتىناسى توقتاپ تۇر.
مينيسترلىك قازىرگى ۋاقىتتا ءتورت وبلىستى – اقمولا، سولتۇستىك قازاقستان، شىعىس قازاقستان جانە اباي وبلىستارىن – ەرەكشە باقىلاۋعا العانىن مالىمدەدى. دەگەنمەن، بيىلعى سۋ تاسقىنى قاۋپى وتكەن جىلمەن سالىستىرعاندا الدەقايدا تومەن ەكەنى ايتىلدى.
ەسكە سالا كەتەيىك، بۇعان دەيىن اتباسار مەن ماكينسك قالالارىندا دا سۋ تاسقىنىنا بايلانىستى قيىن جاعداي ورىن العان بولاتىن. الەۋمەتتىك جەلىلەردە تاراعان بەينەماتەريالداردا ۇيلەردىڭ جارتىسىنا دەيىن سۋ كىرىپ كەتكەنى بايقالادى. تۇرعىنداردىڭ ايتۋىنشا، مۇنداي جاعداي ءار كوكتەم سايىن قايتالانۋدا. 19 ناۋرىزدا ماكينسك قالاسىنداعى مەكتەپ سۋ تاسقىنى سالدارىنان قاشىقتان وقىتۋ فورماتىنا كوشىرىلگەن.
