ۋكراينالىق اسكەريلەر دونەتسك وبلىسىندا رەسەي اسكەرىنىڭ قۇرامىندا سوعىسقان قىتايدىڭ ەكى ازاماتىن تۇتقىندادى. بۇل تۋرالى ۋكراينا پرەزيدەنتى ۆلاديمير زەلەنسكي مالىمدەدى، دەپ حابارلايدى "ادىرنا" ۇلتتىق پورتالى.
ۋكراينا سىرتقى ىستەر مينيسترلىگى قىتايدىڭ كيەۆتەگى ىستەر جونىندەگى ۋاقىتشا سەنىمدى وكىلىنەن وسىعان قاتىستى تۇسىنىكتەمە تالاپ ەتۋ ءۇشىن شاقىرعانىن ۋكراينا سىرتقى ىستەر ءمينيسترى اندرەي سيبيگا حابارلادى.
AFP اگەنتتىگىنە اتى-ءجونىن اتاماۋدى سۇراعان جوعارى لاۋازىمدى ۋكراين شەنەۋنىگىنىڭ مالىمەت بويىنشا، اڭگىمە قىتاي حالىق رەسپۋبليكاسىنىڭ اسكەري قىزمەتكەرلەرى تۋرالى ەمەس، رەسەي ارمياسىمەن كەلىسىمشارتقا وتىرعان ادامدار جايىندا بولعان.
ۋكراينا پرەزيدەنتىنىڭ ايتۋىنشا، قارۋلى كۇشتەر رەسەيدىڭ وككۋپاتسيالىق ارمياسىنىڭ قۇرامىندا سوعىسقان قىتايدىڭ ەكى ازاماتىن تۇتقىنداعان.
«بۇل تۇتقىنداردىڭ قۇجاتتارى، بانك كارتالارى، جەكە دەرەكتەرى بار. وككۋپانت بولىمشەلەرىندە مۇنداي قىتاي ازاماتتارى ەكەۋدەن دە كوپ بولۋى مۇمكىن. قازىر بارلىق فاكتىلەر تەكسەرىلىپ جاتىر. بارلاۋ، سبۋ، قارۋلى كۇشتەردىڭ ءتيىستى بولىمشەلەرى جۇمىس جۇرگىزۋدە»، — دەپ جازدى ۋكراينا پرەزيدەنتى.
France-Presse اگەنتتىگىنىڭ حابارلاۋىنشا، ۋكراينا رەسەيدىڭ ءۇش جىل بۇرىنعى باسقىنشىلىعى باستالعالى بەرى العاش رەت قىتاي ازاماتتارىنىڭ ءوز اۋماعىندا سوعىسقا قاتىسقانىن مالىمدەدى.
قازىرگى ۋاقىتتا بەيجىڭ بۇل مالىمدەمەلەرگە قاتىستى ەشقانداي جاۋاپ بەرگەن جوق.
AFP اگەنتتىگىنە ءمالىم بولعان قۇجاتتارعا سايكەس، تۇتقىندالعان قىتاي ازاماتتارىنىڭ ءبىرى 34 جاستا، قىتاي حالقىنىڭ نەگىزگى ەتنيكالىق توبى سانالاتىن حان ۇلتىنا جاتادى. ال تىركەۋدە ورتالىق قىتايداعى سينچجەن قالاسىندا تۇر.
پرەزيدەنت زەلەنسكي سىرتقى ىستەر مينيسترىنە قىتايمەن دەرەۋ بايلانىسىپ، پەكين بۇل جاعدايعا قالاي جاۋاپ بەرەتىنىن انىقتاۋدى تاپسىرعانىن حابارلادى.
ۋكراينا سىرتقى ىستەر ءمينيسترى اندرەي سيبيگانىڭ ايتۋىنشا، قىتاي ازاماتتارىنىڭ رەسەي اسكەرىنىڭ قۇرامىندا ۋكرايناعا قارسى سوعىسقا قاتىسۋى قىتايدىڭ بەيبىتشىلىككە قاتىستى جاريا ەتكەن ۇستانىمىنا كۇمان تۋدىرىپ، بۇۇ قاۋىپسىزدىك كەڭەسىنىڭ تۇراقتى مۇشەسى رەتىندە پەكينگە دەگەن سەنىمدى السىرەتەدى.
«رەسەيدىڭ قىتايدى تىكەلەي نەمەسە جاناما تۇردە بۇل سوعىسقا تارتۋى — ءپۋتيننىڭ سوعىستى توقتاتۋعا ەمەس، ونى جالعاستىرۋدىڭ جولدارىن ىزدەپ جاتقانىن كورسەتەدى. بۇل ناقتى بەلگى. بۇعان اقش، ەۋروپا جانە بەيبىتشىلىكتى قالايتىن بۇكىل الەمنىڭ جاۋابى قاجەت»، — دەپ مالىمدەدى ۋكراينا پرەزيدەنتى.
