بەلگىلى اكتەر ءشارىپ سەرىك اتىشۋلى ۆيدەودان كەيىن ءىرى مەدياكومپانيانىڭ قارا تىزىمىنە ەنىپ، پوليتسيا تەرگەۋ جۇرگىزىپ جاتىر، دەپ حابارلايدى “ادىرنا” ۇلتتىق پورتالى.
الماتى قالالىق ءىىد ءباسپاسوز قىزمەتى ءاليا بوتەەۆانىڭ الەۋمەتتىك جەلىدەگى مالىمدەمەسى بويىنشا تەكسەرۋ جۇرگىزىلىپ جاتقانىن حابارلادى.
"وقيعاعا قاتىستى تەرگەۋ امالدارى جۇرگىزىلۋدە. وقيعانىڭ بولعان ورنى مەن ۋاقىتىن قوسا العاندا، وبەكتيۆتى ءمان-جايلار انىقتالىپ، قازاقستان رەسپۋبليكاسىنىڭ زاڭناماسىنا سايكەس شارالار قابىلداناتىن بولادى", – دەلىنگەن حابارلامادا.
سونداي-اق، قازاقستاندىق مەدياكومپانيا Salem Entertainment كومانداسى اكتەر ءشارىپ سەرىكتى قارا تىزىمگە ەنگىزگەنىن ايتتى.
"سوڭعى وقيعالارعا بايلانىستى Salem Entertainment كومانداسى اكتەر ءشارىپ سەرىكتى قارا تىزىمگە ەنگىزۋ جانە بارلىق ىنتىماقتاستىقتى تولىعىمەن توقتاتۋ تۋرالى شەشىم قابىلدادى. قازىرگى ۋاقىتتا بۇعان دەيىن جاريالانعان "شاكال" جوبالارى مەن "قارعا" سەريالىنىڭ ءۇشىنشى ماۋسىمى توقتاتىلدى، سونىمەن قاتار اكتەر باستى رولدەردىڭ ءبىرىن سومداۋى ءتيىس "Meow" سەريالىنىڭ ەكىنشى ماۋسىمىنا تۇسپەيدى.سونىمەن قاتار، "پاترۋل: سوڭعى بۇيرىق" ءفيلمىنىڭ كومانداسى پروكاتقا دايىندالىپ جاتقان فيلمنەن ءشارىپ سەرىككە قاتىستى كورىنىستەردى الىپ تاستاۋ بويىنشا بەلسەندى جۇمىس ىستەپ جاتىر", – دەلىنگەن حابارلامادا.
اكتەرمەن بارلىق كەلىسىمشارتتار بۇزىلدى، دەپ قورىتىندىلادى مەدياكومپانيا.
ايتا كەتسەك، ءساۋىردىڭ 3-ءى كۇنى الماتى تۇرعىنى ءاليا بوتەەۆا جىگىتى ءشارىپ سەرىكتىڭ وزىنە قارسى قول كوتەرگەنىن ايتىپ، دالەل رەتىندە ۆيدەو مەن فوتونى جاريالاعانىن حابارلادىق.
