استانادا 21 جاستاعى گەيمەر ويىنعا قاتىستى ەسكەرتۋ جاساعان تۋىسىن پىشاقتاپ ءولتىردى، دەپ حابارلايدى "ادىرنا" ۇلتتىق پورتالى.
«كۇدىكتى، ەلوردادا تۇراتىن 21 جاستاعى ازامات، ۇستالىپ، ۋاقىتشا ۇستاۋ يزولياتورىنا قامالدى. كىسى ءولتىرۋ فاكتىسى بويىنشا قىلمىستىق ءىس قوزعالدى. الدىن الا مالىمەتتەر بويىنشا، جانجالدىڭ سەبەبى تۋىستارىنىڭ وعان جاساعان ەسكەرتۋى بولعان. وقيعانىڭ ءمان-جايى انىقتالۋدا»، – دەپ حابارلادى استانا پوليتسيا دەپارتامەنتىنىڭ ءباسپاسوز قىزمەتى.
جۋرناليست ميحايل كوزاچكوۆ ءوزىنىڭ Telegram-كانالىندا 21 جاستاعى ەر ادامنىڭ نەمەرە اعاسىن ءولتىرىپ، ءۇش تۋىسىن پىشاقتاعانىن جازدى. الدىن الا مالىمەت بويىنشا، ولاردىڭ اراسىندا كومپيۋتەر ويىنىنا بايلانىستى جانجال بولعان.
«جىگىتتىڭ جالعىز اۋەستىگى – Standoff 2 ويىنى بولعان، وندا قارسىلاستاردى اتىپ، گراناتا لاقتىرىپ، پىشاقپەن شابۋىل جاساۋعا بولادى. تەرگەۋ نۇسقاسى بويىنشا، سول قايعىلى ءتۇنى جىگىت سمارتفوننان سۇيىكتى ويىنىن ويناپ وتىرعان. تۇنگى ساعات ءۇش شاماسىندا تۋىسى ودان تەلەفوندى ءوشىرىپ، ۇيىقتاۋىن سۇراعان. سەبەبى بۇكىل وتباسى دەمالىپ جاتقان. بىراق ول وتىنىشكە نازار اۋدارماعان»، – دەپ جازدى كوزاچكوۆ.
ءجۋرناليستتىڭ ايتۋىنشا، كەيىن تۋىسى جىگىتتەن قايتادان تىنىشتىق ساقتاپ، باسقالارعا ۇيىقتاۋعا كەدەرگى كەلتىرمەۋىن تالاپ ەتكەن. بۇل جانجالدىڭ سەبەبى بولۋى مۇمكىن.
«بارلىعى ۇيىقتاپ جاتقاندا، جانعالي جۇماتاەۆ اس ءۇي پىشاعىن الىپ، نەمەرە اعاسىنا – ەسكەرتۋ جاساعان تۋىسىنىڭ ۇلىنا 20-دان استام سوققى جاساعان. جاراقات سالدارىنان 28 جاستاعى ەر ادام جەدەل جاردەم كەلگەنشە كوز جۇمعان. ونىڭ ايقايىنان ويانعان باسقا تۋىستارىنا دا جۇماتاەۆ پىشاقپەن شابۋىل جاساعان. 50 جاستاعى ايەلدىڭ بەتى مەن موينىندا كوپ جاراقاتتار بار، 60 جاستاعى ايەلدىڭ قابىرعالارى سىنعان، كەۋدە تۇسىندا جانە باسقا دەنە بولىكتەرىندە جاراقاتتار بار»، – دەپ جازدى جۋرناليست.
كوزاچكوۆتىڭ ايتۋىنشا، شابۋىلداۋشىنىڭ نەمەرە قارىنداسىنىڭ باسىندا، كەۋدەسىندە جانە ارقاسىندا كوپتەگەن پىشاق جاراقاتتارى بار.
«قازىر ءۇش زارداپ شەككەن ايەل اۋرۋحانادا. ولاردىڭ ءتىرى قالۋعا مۇمكىندىگى بار»، – دەپ قورىتىندىلادى جۋرناليست.
