Astanada 21 jastaǵy geımer oıynǵa qatysty eskertý jasaǵan týysyn pyshaqtap óltirdi, dep habarlaıdy "Adyrna" ulttyq portaly.
«Kúdikti, elordada turatyn 21 jastaǵy azamat, ustalyp, ýaqytsha ustaý ızolıatoryna qamaldy. Kisi óltirý faktisi boıynsha qylmystyq is qozǵaldy. Aldyn ala málimetter boıynsha, janjaldyń sebebi týystarynyń oǵan jasaǵan eskertýi bolǵan. Oqıǵanyń mán-jaıy anyqtalýda», – dep habarlady Astana polıııa departamentiniń baspasóz qyzmeti.
Jýrnalıst Mıhaıl Kozachkov óziniń Telegram-kanalynda 21 jastaǵy er adamnyń nemere aǵasyn óltirip, úsh týysyn pyshaqtaǵanyn jazdy. Aldyn ala málimet boıynsha, olardyń arasynda kompıýter oıynyna baılanysty janjal bolǵan.
«Jigittiń jalǵyz áýestigi – Standoff 2 oıyny bolǵan, onda qarsylastardy atyp, granata laqtyryp, pyshaqpen shabýyl jasaýǵa bolady. Tergeý nusqasy boıynsha, sol qaıǵyly túni jigit smartfonnan súıikti oıynyn oınap otyrǵan. Túngi saǵat úsh shamasynda týysy odan telefondy óshirip, uıyqtaýyn suraǵan. Sebebi búkil otbasy demalyp jatqan. Biraq ol ótinishke nazar aýdarmaǵan», – dep jazdy Kozachkov.
Jýrnalısttiń aıtýynsha, keıin týysy jigitten qaıtadan tynyshtyq saqtap, basqalarǵa uıyqtaýǵa kedergi keltirmeýin talap etken. Bul janjaldyń sebebi bolýy múmkin.
«Barlyǵy uıyqtap jatqanda, Janǵalı Jumataev as úı pyshaǵyn alyp, nemere aǵasyna – eskertý jasaǵan týysynyń ulyna 20-dan astam soqqy jasaǵan. Jaraqat saldarynan 28 jastaǵy er adam jedel járdem kelgenshe kóz jumǵan. Onyń aıqaıynan oıanǵan basqa týystaryna da Jumataev pyshaqpen shabýyl jasaǵan. 50 jastaǵy áıeldiń beti men moınynda kóp jaraqattar bar, 60 jastaǵy áıeldiń qabyrǵalary synǵan, keýde tusynda jáne basqa dene bólikterinde jaraqattar bar», – dep jazdy jýrnalıst.
Kozachkovtyń aıtýynsha, shabýyldaýshynyń nemere qaryndasynyń basynda, keýdesinde jáne arqasynda kóptegen pyshaq jaraqattary bar.
«Qazir úsh zardap shekken áıel aýrýhanada. Olardyń tiri qalýǵa múmkindigi bar», – dep qorytyndylady jýrnalıst.
