اقش پرەزيدەنتى بولىپ قايتا سايلانعان دونالد ترامپتى ۇلىقتاۋ سالتاناتىنا ون كۇن قالعاندا، وعان قاتىستى قىلمىستىق ءىستىڭ ۇكىمى جاريالاناتىنى بەلگىلى بولدى، دەپ حابارلايدى "ادىرنا" ۇلتتىق پورتالى BBC-گە سىلتەپ.
ترامپ پورنوجۇلدىز ستورمي دەنيەلسكە اۋىزباستىرىق رەتىندە اقشا تولەگەنىن جاسىرىپ، جازبالاردى بۇرمالاعانى ءۇشىن ايىپتالعان. ءىستى قاراعان سۋديا حۋان مەرچان قاڭتاردىڭ 10-ى كۇنى ۇكىم جاريالايتىنىن مالىمدەدى.
سۋديانىڭ ايتۋىنشا، ترامپقا تۇرمە جازاسى تاعايىندالمايدى. ول جەڭىل جازا، مىسالى، ايىپپۇل نەمەسە پروباتسيالىق باقىلاۋ مۇمكىندىگىن قاراستىرۋدا. سوت ۇكىمىنە دونالد ترامپ جەكە ءوزى قاتىسا الادى نەمەسە بەينەبايلانىس ارقىلى قوسىلۋعا رۇقسات ەتىلدى.
مامىر ايىندا قازىلار القاسى ترامپتى 34 ايىپ بويىنشا كىنالى دەپ تاپقان ەدى. دەگەنمەن، ترامپ بۇل ايىپتاردى مويىنداعان جوق. ونىڭ ادۆوكاتتارى پرەزيدەنتتىك يممۋنيتەتكە سۇيەنە وتىرىپ، ءىستى توقتاتۋدى تالاپ ەتتى، الايدا سوت ۇكىم شىعارۋ ءراسىمىن كەيىنگە قالدىرعانىمەن، ونى مۇلدەم توقتاتقان جوق.
بۇل ءىس ترامپقا قاتىستى شىعارىلعان جالعىز قىلمىستىق ۇكىم بولىپ وتىر. ساياساتكەر نيۋ-يورك سوتتارىنا شاعىمدانۋعا قۇقىلى. بۇعان دەيىن ترامپقا قارسى ەكى فەدەرالدى ءىس ونىڭ سايلانۋىنا بايلانىستى توقتاتىلعان. ال دجوردجياداعى سوت ءىسى سايلاۋ زاڭناماسىن بۇزۋعا بايلانىستى ۋاقىتشا توقتاپ تۇر.
ترامپقا قاتىستى سوت پروتسەسى وتكەن جىلدىڭ ساۋىرىندە باستالعان. بۇل جاعداي اقش تاريحىنداعى پرەزيدەنتكە قارسى ەڭ ۇلكەن قىلمىستىق ىستەردىڭ ءبىرى رەتىندە قاراستىرىلۋدا.
