25 جەلتوقسان كۇنى قر مادەنيەت جانە اقپارات مينيسترلىگىنىڭ ۇيىمداستىرۋىمەن حالىق جازۋشىسى، مەملەكەتتىڭ سىيلىقتىڭ لاۋرەاتى، كورنەكتى اقىن فاريزا وڭعارسىنوۆانىڭ
85 جىلدىعىنا ارنالعان «پوەزيا پاديشاسى» اتتى سالتاناتتى جيىن ءوتتى.
جيىنعا قر مادەنيەت جانە اقپارات ءمينيسترى ايدا بالاەۆا، قازاقستان جازۋشىلار وداعىنىڭ توراعاسى مەرەكە قۇلكەنوۆ، مەملەكەت جانە قوعام قايراتكەرلەرى باقتىقوجا ىزمۇحامبەتوۆ، قۋانىش سۇلتانوۆ پەن زيالى قاۋىم وكىلدەرى، اقىننىڭ تۋعان تۋىستارى قاتىستى.
سالتاناتتى شارادا العاش ءسوز العان قر مادەنيەت جانە اقپارات ءمينيسترى ايدا بالاەۆا:
- بۇگىن – فاريزا اپامىزدىڭ تۋعان كۇنى. اقىن كوزى ءتىرى بولسا 85 جاسقا تولار ەدى. بۇگىنگى ءىس-شارانى ۇلتتىق ارحيۆتە وتكىزۋدىڭ وزىندىك ءمانى بار. سەبەبى وسىدان از ۋاقىت بۇرىن فاريزا وڭعارسىنوۆانىڭ جەكە قورىنان قولجازبالارى مەن قۇندى قۇجاتتار ارحيۆكە تابىستالعان ەدى. مۇقاعالي ماقاتەۆ فاريزا وڭعارسىنوۆاعا ارناعان جىرىندا “ارحيۆتەردەن تابىلارمىز…” دەگەن ءسوز ايتىپ ەدى. اقىننىڭ التىن قور، اسىل مۇرالارى بولاشاق فاريزاتانۋشىلارعا ولشەۋسىز ازىق بولىپ، جاڭا مۇمكىندىكتەرگە جول اشادى دەپ سەنەمىن.
فاريزا وڭعارسىنوۆانىڭ ونەگەلى ءومىر جولىن، وشپەس مۇراسىن ۇلت بولىپ ۇلىقتاپ، كەيىنگى ۇرپاققا جەتكىزۋ – بارشامىزعا ورتاق پارىز، - دەپ ساليقالى ءسوز سويلەدى.
بۇدان سوڭ مەملەكەتتىك تاپسىرىسپەن جارىق كورگەن «فاريزا وڭعارسىنوۆا «تاڭدامالى» كىتابىنىڭ تۇساۋكەسەر ءراسىمى ءوتتى.
سونداي-اق قازاقستان رەسپۋبليكاسى ۇلتتىق ءارحيۆىنىڭ ديرەكتورى س.نۇرلانوۆا اقىننىڭ ۇلى الماس وڭعارسىنوۆقا فاريزا وڭعارسىنوۆانىڭ جەكە تەكتىك قورىنىڭ اشىلۋىن كۋالاندىراتىن سەرتيفيكاتتى تابىستادى.
ايتا كەتەيىك سالتاناتتى جيىن اياسىندا فاريزا وڭعارسىنوۆانىڭ ءومىر دەرەكتەرىنەن سىر شەرتەر قۇجاتتىق كورمە ۇيىمداستىرىلدى. كورمەگە اقىننىڭ ءوز قولىمەن جازعان وتباسىلىق شەجىرەسى مەن ءومىربايانى، «كوگەرشىندەرىم» ولەڭدەر جيناعىنان قولجازبالار، «ءداستۇردى بىلەسىڭ بە؟» ت.ب. وي-تولعامدارى، م. ماقاتاەۆتىڭ 60 جىلدىعىندا سويلەگەن ءسوزى، نوتالارى مەن بۇرىن-سوڭدى جاريالانباعان فوتوسۋرەتتەرى جانە حاتتارىنان جيناقتالعان 50-گە جۋىق قۇجاتتارى قويىلدى.
مايرا رايمبەرديەۆا
قر ۇلتتىق ءارحيۆىنىڭ قىزمەتكەرى
