قر ىشكى ىستەر ءمينيسترىنىڭ ورىنباسارى يگور لەپەحا "شترافستان" ماسەلەسىنە بايلانىستى سۇراقتاردى بۇل نورمالاردى قابىلداعان دەپۋتاتتارعا جولداۋدى ۇسىندى، دەپ حابارلايدى "ادىرنا" ۇلتتىق پورتالى قازتاگ-قا سىلتەپ.
لەپەحا سەنات دالىزىندە سويلەگەن سوزىندە ورتاشا جىلدامدىقتى اسىرعانى ءۇشىن جۇرگىزىلگەن تەكسەرىستەر تۋرالى ايتتى.
ء"بىز اراقاشىقتىقتى ناقتى تەكسەرىپ، ولشەۋ جۇرگىزدىك. ءبىر اي ىشىندە ورتاشا جىلدامدىقتى اسىرعان 585 جاعداي تىركەلدى. قازىرگى ۋاقىتتا بۇل جۇيە تەستتىك رەجيمدە جۇمىس ىستەپ تۇر جانە ەشقانداي ايىپپۇل سالىنعان جوق،" – دەدى ول.
جۋرناليستەر قازاقستاندىقتاردىڭ ايىپپۇلدارعا بايلانىستى نارازىلىقتارىن جەتكىزگەندە، لەپەحا بۇل ماسەلەنىڭ تىم شيەلەنىسكەنىن ايتتى.
"قازىرگى كۇنگە دەيىن ورتاشا جىلدامدىقتى اسىرعانى ءۇشىن ەشكىم جازاعا تارتىلعان جوق. تراسسالاردا بۇرىننان جۇمىس ىستەپ كەلە جاتقان كامەرالار مومەنتتىك جىلدامدىقتى ولشەيدى. ەگەر جۇرگىزۋشى رۇقسات ەتىلگەن 140 كم/ساع جىلدامدىقتىڭ ورنىنا 160 كم/ساع جىلدامدىقپەن جۇرسە، بۇعان ايىپپۇل سالىنعان، سولاي جالعاسا بەرەدى،" – دەدى ۆيتسە-مينيستر.
جۋرناليستەر "شترافستان" ماسەلەسىن العاش كوتەرگەن دەپۋتاتتاردىڭ پىكىرىن ەسكە سالعاندا، لەپەحا جاۋاپكەرشىلىك تۋرالى ءوز پىكىرىن ءبىلدىردى:
"دەپۋتاتتارعا سۇراقتارىڭىزدى باعىتتاڭىزدار. مەنىڭ ويىمشا، زاڭ بۇزعان ءار ادام بەلگىلەنگەن ءتارتىپ بويىنشا جاۋاپكەرشىلىككە تارتىلۋى كەرەك. ەگەر زاڭدا ايىپپۇل قاراستىرىلسا، ءبىزدىڭ مىندەتىمىز – ونى ورىنداۋ،" – دەدى ول.
ەسكە سالا كەتسەك، 4 جەلتوقساندا "اق جول" فراكتسياسىنىڭ دەپۋتاتى ازات پەرۋاشەۆ ايىپپۇلدار تۋرالى زاڭعا وزگەرىستەر ەنگىزۋگە قارسى شىعىپ، "شترافستان" جايىندا ايتقان بولاتىن.
