كوكشەتاۋداعى ەكى قاباتتى ماعجان جۇماباەۆ اتىنداعى وبلىستىق عىلىمي كىتاپحانادا ءورت بولدى، دەپ حابارلايدى "ادىرنا" ۇلتتىق پورتالى قازتاگ-قا سىلتەپ.
بۇل عيماراتقا جاقىندا عانا 500 ميلليون تەڭگەگە كۇردەلى جوندەۋ جۇرگىزىلگەن بولاتىن.
اقمولا وبلىسى توتەنشە جاعدايلار دەپارتامەنتىنىڭ مالىمەتىنشە، ءورت 10 شارشى مەتر اۋماقتى قامتىعان. ءبىرىنشى قاباتتا كىتاپ سورەسى تۇتانىپ، ءورت شىققان. زارداپ شەككەندەر جوق. ءورتتىڭ سەبەبى انىقتالۋدا.
وقيعا ورنىنا بارعان قازتاگ رەداكتسياسى اقپارات تاراتتى.
ورتكە ورانعان عيماراتتان كىتاپتار كوشەگە شىعارىلعان. فويەدە دە وتقا زاقىمدانعان كىتاپتاردىڭ ۇيىندىلەرى جاتىر. ءورتتىڭ سالدارىنان عيماراتتىڭ ىشكى بولىگى قاتتى بۇلىنگەن، الداعى قالپىنا كەلتىرۋ جۇمىستارىنا قوسىمشا قاراجات قاجەت بولۋى مۇمكىن.
ماعجان جۇماباەۆ اتىنداعى اقمولا وبلىستىق عىلىمي كىتاپحاناسى 2024 جىلدىڭ جەلتوقسانىندا كۇردەلى جوندەۋدەن كەيىن اشىلعان بولاتىن. جوندەۋ جۇمىستارىنا بيۋدجەتتەن 409 ميلليون تەڭگە بولىنگەن.
سونىمەن قاتار، «مەملەكەتتىك ساتىپ الۋ» پورتالىنداعى مالىمەتتەرگە سايكەس، 2023 جىلى كىتاپحانا باسشىلىعى عيماراتتى جوندەۋ جۇمىستارىن اياقتاۋ ءۇشىن قوسىمشا تەندەر وتكىزگەن. تەندەردى «KAZ ستروي PLAST» جشس جەڭىپ العان، بۇل جۇمىستاردىڭ قۇنى ققس-تى قوسا ەسەپتەگەندە 98,2 ميلليون تەڭگەنى قۇرادى. وسىلايشا، كىتاپحانانىڭ كۇردەلى جوندەۋىنە جالپى 500 ميلليون تەڭگە جۇمسالعان.
