قىرعىزستان پارلامەنتىندە تالقىلانىپ جاتقان «ءدىني سەنىم بوستاندىعى جانە ءدىني بىرلەستىكتەر تۋرالى» جاڭا زاڭ جوباسىندا مەملەكەتتىك ورگاندار مەن قوعامدىق ورىنداردا نيكاب نەمەسە پاراندجا كيۋگە تىيىم سالىنۋى مۇمكىن. بۇل تالاپتى بۇزعاندارعا 20 مىڭ سوم كولەمىندە ايىپپۇل سالۋ ۇسىنىلعان، دەپ حابارلايدى "ادىرنا" ۇلتتىق پورتالى.
اكىمشىلىك قۇقىق بۇزۋشىلىقتار تۋرالى كودەكسكە 127.1-باپتى ەنگىزۋ ۇسىنىلدى. باپقا سايكەس، ادامنىڭ جەكە باسىن انىقتاۋعا كەدەرگى كەلتىرەتىن كيىم كيۋگە شەكتەۋ قويىلادى.
دەپۋتات داستان بەكەشەۆ ايىپپۇلدىڭ مولشەرىن سىنعا الدى.
“نيكابتى كوبىنەسە الەۋمەتتىك تۇرعىدان وسال ايەلدەر كيەدى. 20 مىڭ سوم ايىپپۇل ولارعا اۋىر جۇك بولادى. ال جوعارى تابىسى بار ايەلدەر اراسىندا نيكاب كيەتىندەر سيرەك كەزدەسەدى،” – دەپ مالىمدەدى ول.
ءدىن ىستەرى جونىندەگى مەملەكەتتىك كوميسسيا بۇعان دەيىن نيكابقا تىيىم سالاتىن نورمانى الىپ تاستاۋ تۋرالى ۇسىنىس بىلدىرگەن ەدى. ولار بۇل شەشىمنىڭ دەموكراتيا پرينتسيپتەرىنە قايشى ەكەنىن ايتتى.
الايدا زاڭ جوباسىنىڭ اۆتورلارى بۇل پىكىرمەن كەلىسپەي، شەكتەۋ تەك جەكە باسىن انىقتاۋعا مۇمكىندىك بەرمەيتىن كيىمدەرگە قاتىستى ەكەنىن العا تارتتى.
پارلامەنتتە ءدىني سالاداعى زاڭدارعا وزگەرىستەر ەنگىزۋ تۋرالى زاڭ جوباسى ەكىنشى وقىلىمدا قارالادى.
