Қырғызстан парламентінде талқыланып жатқан «Діни сенім бостандығы және діни бірлестіктер туралы» жаңа заң жобасында мемлекеттік органдар мен қоғамдық орындарда никаб немесе паранджа киюге тыйым салынуы мүмкін. Бұл талапты бұзғандарға 20 мың сом көлемінде айыппұл салу ұсынылған, деп хабарлайды "Адырна" ұлттық порталы.
Әкімшілік құқық бұзушылықтар туралы кодекске 127.1-бапты енгізу ұсынылды. Бапқа сәйкес, адамның жеке басын анықтауға кедергі келтіретін киім киюге шектеу қойылады.
Депутат Дастан Бекешев айыппұлдың мөлшерін сынға алды.
“Никабты көбінесе әлеуметтік тұрғыдан осал әйелдер киеді. 20 мың сом айыппұл оларға ауыр жүк болады. Ал жоғары табысы бар әйелдер арасында никаб киетіндер сирек кездеседі,” – деп мәлімдеді ол.
Дін істері жөніндегі мемлекеттік комиссия бұған дейін никабқа тыйым салатын норманы алып тастау туралы ұсыныс білдірген еді. Олар бұл шешімнің демократия принциптеріне қайшы екенін айтты.
Алайда заң жобасының авторлары бұл пікірмен келіспей, шектеу тек жеке басын анықтауға мүмкіндік бермейтін киімдерге қатысты екенін алға тартты.
Парламентте діни саладағы заңдарға өзгерістер енгізу туралы заң жобасы екінші оқылымда қаралады.
