الماتىنىڭ شۇعىلا اۋدانىندا قازاقستاندىق تاي بوكسىنان الەم چەمپيونى ءالي سەرىك پىشاق جاراقاتىنان كوز جۇمدى. قىلمىسقا مارقۇمنىڭ سىنىپتاسى كۇدىكتى رەتىندە قاماۋعا الىندى، دەپ حابارلايدى "ادىرنا" ۇلتتىق پورتالى.
مارقۇمنىڭ جاقىندارى بۇل وقيعاعا تەرگەۋدىڭ ءادىل جۇرگىزىلىپ، كىنالىگە قاتاڭ جازا تاعايىندالۋىن تالاپ ەتىپ وتىر.
مارقۇمنىڭ اناسى اقمارال تابىسبەكقىزىنىڭ ايتۋىنشا، كۇدىكتى اليمەن بىرگە 11 جىل ءبىر سىنىپتا وقىعان جانە ولاردىڭ اراسىندا ەشقانداي دۇشپاندىق بايقالماعان.
“ول اليمەن بىرگە اۋىزاشارعا قاتىسىپ، وتباسىمىزعا كومەكتەسىپ جۇرگەن بالا ەدى. بىراق سول كۇنى جانجال شىعىپ، جۇرەك تۇسىنان ءتورت رەت پىشاقتاپ، موينىنان جاراقات سالدى. قولىندا ەكى پىشاعى بولعان”، – دەدى اناسى.
مارقۇمنىڭ باپكەرى راميس عابيتوۆ ءاليدىڭ الەم چەمپيونى اتانعان ەڭ جاس سپورتشى بولعانىن اتاپ ءوتتى.
ء“بىز ودان ۇلكەن ءۇمىت كۇتتىك. ول جاستارعا ۇلگى بولاتىن. كەلەر جىلى ەرەسەكتەر اراسىنداعى قازاقستان چەمپيوناتىنا قاتىسۋى كەرەك ەدى. ءالي سول دودانى جەڭىپ، ازيا چەمپيوناتىندا ونەر كورسەتۋدى جانە كاسىبي سپورتقا ءوتۋدى جوسپارلاعان ەدى،” – دەدى باپكەر.
الماتى قالاسى پوليتسيا دەپارتامەنتىنىڭ رەسمي وكىلى سالتانات ازىربەكتىڭ مالىمدەۋىنشە، كۇدىكتى “اراداعى جانجال سالدارىنان پىشاق جاراقاتىن سالدىم” دەپ تۇسىنىكتەمە بەرگەن.
“قىلمىستىق ءىس جۇرگىزۋ كودەكسىنىڭ 128-بابىنا سايكەس، ول قاماۋعا الىندى. قىلمىستىڭ باسقا دا ءمان-جايى انىقتالىپ جاتىر،” – دەدى سالتانات ازىربەك.
جانتۇرشىگەرلىك جاعدايعا كۋا بولعانداردىڭ ايتۋىنشا، ءالي پىشاق جاراقاتىنان كەيىن قانسىراپ، جاقىن ماڭداعى ورىنعا قۇلاعان.
“ەكى جىگىت قاشتى، ال ءبىر جىگىت ارتىنان قۋدى. ءالي ءتىرى جاتقان، بىراق كوز الدىمدا جان تاپسىردى،” – دەدى كۋاگەر سەرىك راقىشەۆ.
قايعىلى وقيعا بۇكىل ەلدى ءدۇر سىلكىندىردى. جاقىندارى مەن قوعام وكىلدەرى تەرگەۋدىڭ ءادىل جۇرگىزىلۋىن تالاپ ەتۋدە. مارقۇمنىڭ وتباسى بۇل قايعىلى وقيعاعا كىنالى ادامنىڭ ءادىل جازالانۋىن سۇرايدى.
