الماتىدا قوعامدىق كولىكتە جول ءجۇرۋ اقىسى 20 تەڭگەگە كوتەرىلۋى مۇمكىن. بۇگىن، 1 شىلدەدە قالا اكىمدىگىنىڭ قاۋلى جوباسى قوعاممەن تالقىلانۋ ءۇشىن «اشىق نقا» سايتىندا جاريالاندى، دەپ حابارلايدى «ادىرنا» ءتىلشىسى.
قالالىق موبيلدىلىك باسقارماسى بيىل قوعامدىق كولىكتە جول ءجۇرۋ ءۇشىن ورتاشا تاريف 310 تەڭگە، ال كەيبىر مارشرۋتتا 400 تەڭگەگە جەتەتىنىن مالىمدەدى. ايتۋلارىنشا، وسىعان بايلانىستى جىل سايىن تاسىمالداۋشىلارعا تولەنەتىن سۋبسيديا مولشەرى ءوسىپ جاتىر. 2023 جىلى 68,7 ميلليارد تەڭگە بولىنسە، 2024 جىلى سۋبسيديانىڭ بولجامدى سوماسى 97,3 ميلليارد تەڭگەگە دەيىن ۇلعايعان.
«قالا تاسىمالداۋشىلارى قولدانىستاعى تاريف تاسىمالداۋشىلاردىڭ اۆتوبۋس ساتىپ الۋعا، جاڭارتۋعا جانە ۋاقىتىلى قىزمەت كورسەتۋگە، سونداي-اق جۇرگىزۋشىلەردىڭ جالاقىسىن كوتەرۋگە جۇمساعان شىعىندى وتەمەيدى دەپ بىرنەشە رەت حابارلادى. تاسىمالداۋشىلارعا جانە جەرگىلىكتى بيۋدجەتكە جۇكتەمەنى ءىشىنارا ازايتۋ ماقساتىندا قالالىق قاتىناستاردا جولاۋشىلار مەن باگاجدى اۆتوموبيلمەن تۇراقتى تاسىمالداۋعا تاريف بەلگىلەۋ تۋرالى قالا اكىمدىگى قاۋلىسىنىڭ جوباسى دايىندالدى. جوبا جول ءجۇرۋ ءتاريفىن 120 تەڭگەگە دەيىن كوتەرۋدى كوزدەيدى. تيىسىنشە، ازاماتتاردىڭ جەڭىلدەتىلگەن ساناتتارى ءۇشىن جول ءجۇرۋ قۇنى ءتاريفتىڭ 50%-ى بولادى»،— دەلىنگەن باسقارمانىڭ حابارلاماسىندا.
ايتا كەتەيىك، الماتىدا جول ءجۇرۋ اقىسى 2023 جىلدىڭ تامىزىندا وسكەن بولاتىن. قازىرگى تاڭدا قالادا قوعامدىق كولىكتەگى ءتاريفتىڭ قۇنى قولما-قول اقشاسىز تاسىلمەن تولەگەن كەزدە 100 تەڭگە، ال قولما-قول تولەگەن كەزدە 200 تەڭگە مولشەرىندە بەلگىلەنگەن.
