تۇركيانىڭ باتىسىنداعى قارۋ-جاراق زاۋىتىندا جارىلىس بولىپ، سالدارىنان 12 ادام قازا تاۋىپ، بەسەۋى جارالاندى. بۇل تۋرالى Euronews جازدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، وقيعا سەيسەنبى كۇنى تاڭەرتەڭ بولعان.
انادولى اگەنتتىگىنىڭ حابارلاۋىنشا، جارىلىس كارەسي ايماعى بالىكەسير پروۆينتسياسىنداعى جارىلعىش زاتتار شىعاراتىن زاۋىتتا بولعان.
بالىكەسير گۋبەرناتورى يسمايل ۋستاوعلۋ جارىلىستان نەگىزگى وندىرىستىك عيماراتتاردىڭ ءبىرى وپىرىلعانىن، ال اينالاسىنداعى عيماراتتاردىڭ ازداپ زاقىمدانعانىن ايتتى. ونىڭ ايتۋىنشا، وقيعا ورنىندا تۇرىك پروكۋرورلارى جۇمىس ىستەپ، وقيعانىڭ ءمان-جايىن انىقتاپ جاتىر.
ء“بىزدىڭ بولجامىمىزشا، ىشىندە بىردە-ءبىر ازامات قالعان جوق. جارىلىس تەحنيكالىق سەبەپتەرگە بايلانىستى بولدى”، — دەدى ۋستاوعلۋ.
ادىلەت ءمينيسترى يىلماز تۋنچ X الەۋمەتتىك جەلىسىندە جارىلىستىڭ سەبەپتەرىن انىقتاۋ ءۇشىن ءتورت پروكۋرورعا تاپسىرما بەرىلگەنىن جازدى.
تۇركيا پرەزيدەنتى رەجەپ تايىپ ەردوعان وقيعاعا بايلانىستى كوڭىل ايتتى.
“12 باۋىرىمىزدىڭ قازاسىنا قايعىرىپ كوڭىل ايتامىن”، — دەگەن ول جارالىلاردىڭ تەزىرەك ساۋىعىپ كەتۋىن تىلەدى.
