اقش-تىڭ ۆيتسە-پرەزيدەنتى كامالا ءحارريستىڭ بالالارعا ارنالعان «Superheroes Are Everywhere» كىتابىنىڭ قازاق تىلىنە اۋدارىلعان نۇسقاسى «اتامۇرا» باسپاسىندا جارىق كوردى.
«سۋپەرقاھارماندار ارامىزدا» اتتى كىتاپتىڭ تۇساۋكەسەرى جامبىل اتىنداعى جاسوسپىرىمدەر كىتاپحاناسىندا ءوتتى. شاراعا ارنايى شەتەلدەن كەلگەن قوناقتار، جۋرناليستەر، وقۋشىلار مەن ولاردىڭ ۇستازدارى جينالدى. قازاق تىلىنە اۋدارىلعان كىتاپتى العاش رەت كوپشىلىككە ۇسىنعان «اتامۇرا» باسپاسى بالالار ادەبيەتىنە ەرەكشە كوڭىل ءبولىپ، شەتەلدىك ارىپتەستەرىمەن بىرلەسە جۇمىس ىستەپ كەلەدى.
2019 جىلى العاش جارىق كورگەن بۇل كىتاپ كامالا ءحارريستىڭ اتا-اناسىنان العان ءتالىم-تاربيەسىن، وتباسىلىق قۇندىلىقتارىن بايانداپ، وقىرماندارىنا جاقىن ورتادان الىنعان كۇش-قۋات پەن سەنىمنىڭ ماڭىزدىلىعىن كورسەتەدى. كىتاپتا اتا-انالار مەن بالالار اراسىنداعى قارىم-قاتىناستىڭ ءمانى مەن قوعامنىڭ بالانى تۇلعا رەتىندە قالىپتاستىرۋداعى ءرولى كەڭىنەن تۇسىندىرىلگەن.
كىتاپتى قازاق تىلىنە اۋدارعان جازيرا قۇل-مۇحاممەد ونىڭ تۇپنۇسقاسىنداعى يدەيالار مەن مازمۇندى ۇلتتىق تانىمعا ساي بەيىمدەپ ۇسىنعانىن ايتتى. بۇل ەڭبەكتى باسپا بالالار مەن ولاردىڭ اتا-انالارى قىزىعا وقيدى دەپ سەنەدى.
تۇساۋكەسەر بارىسىندا «اتامۇرا» كورپوراتسياسىنىڭ پرەزيدەنتى راقىمعالي قۇل-مۇحاممەد كىتاپتىڭ نەگىزگى مازمۇنىن ءتۇسىندىرىپ، قاھارماندىقتىڭ شىنايى ءمانىن ايقىندادى.
«اۆتور "قاھارمان دەگەن كىم؟ قاھارمان بولۋ ءۇشىن نە ىستەۋ كەرەك؟", سوعان جاۋاپ بەرەدى. مىسال ءۇشىن قاھارمان بولۋ ءۇشىن ۇلكەن بيىكتىكتى باعىندىرماي-اق، ءوزىڭنىڭ دوسىڭا قامقور بولىپ نەمەسە ءبىر ۇلكەن يگى باستامالاردى باستاپ، حالىقتىڭ يگىلىگىنە جارايتىن ءىستى ىستەسەڭ باتىل بولساڭ، ءتىپتى ۇستازدىڭ ءوزى بويىنداعى بارلىق ءبىلىمىن جاستارعا بەرەتىن بولسا ول دا قاھارمان بولىپ سانالادى. سول تۋرالى ايتادى، تۇسىندىرەدى»، – دەدى ول.
شارا سوڭىندا «اتامۇرا» باسپاسى كىشكەنتاي قوناقتارعا «تاڭعاجايىپ گلوبۋس» اتتى ارنايى باسىپ شىعارعان كىتاپتاردى سىيعا تارتىپ، ەستەلىك سۋرەتكە ءتۇستى. بالالار مەن ولاردىڭ ۇستازدارى كىتاپتىڭ مازمۇنىنا قىزىعۋشىلىق تانىتىپ، اۋدارماشى جازيرا قۇل-مۇحاممەدكە العىستارىن ءبىلدىردى.
جۋرناليست ەسەي جەڭىسۇلى دا كىتاپتىڭ قوعامعا تيگىزەر اسەرى تۋرالى پىكىر ءبىلدىردى.
«اتامۇرا» باسپاناسىنان شىققان "سۋپەرقاھارماندار ارامىزدا" كىتابى بالالار ءۇشىن، اسىرەسە، باستاۋىش سىنىپتاعى بالالار ءۇشىن اسا قۇندى. شىن مانىندە اتا-انامىزدى، تۋىستارىمىزدى، وسكەن ورتامىزدى، ۇستازىمىزدى، ۋنيۆەرسيتەتتەگى بىرگە وقىعان كۋرستاستارىمىزدى، ءار جىلدارى جۇمىس ىستەگەن ازاماتتاردى قادىرلەي الدىق پا؟ ولاردىڭ بويىنان سۋپەر قاھارمانعا ءتان قاسيەتتى بايقاي الدىق پا، ىزدەدىك پە؟ الدە ولاردىڭ تەك تەرىس قاسيەتتەرىن كوردىك پە؟ شىندىعىنا كەلگەندە، بۇل كىتاپ ءبىزدىڭ الەمگە دەگەن كوزقاراسىمىزدىڭ قيسىقتاۋ قالىپتاسقانىن مويىنداتادى»، – دەدى.
شاراعا كەلگەن بالالار كىتاپتىڭ ديزاينى مەن مازمۇنىن قىزىقتاپ، كىتاپ تۋرالى پىكىر ءبىلدىردى.
«ماعان كىتاپ ۇنادى. سۋرەتتەرى دە وتە ەرەكشە. مەن بوس ۋاقىتىمدا كىتاپ وقىعاندى قاتتى جاقسى كورەمىن. الداعى دەمالىستا وسى كىتاپتى الىپ، وقيتىن بولامىن»، - دەدى كىشكەنتاي وقىرمان اسەل.
«سۋپەرقاھارماندار ارامىزدا» كىتابى – قازاق تىلىنە اۋدارىلعان الەمدىك دەڭگەيدەگى ساپالى تۋىندىلاردىڭ ءبىرى. بالالار مەن جاسوسپىرىمدەردى تاربيەلەۋ مەن ولارعا دۇرىس باعىت كورسەتۋگە ارنالعان مۇنداي ەڭبەكتەردىڭ كوپتەپ جارىق كورۋى ۇلتتىق ادەبيەتكە قوسىلعان قوماقتى ۇلەس بولىپ تابىلادى.
سىمبات ناۋحان
«ادىرنا» ۇلتتىق پورتالى
