«اتامۇرا» كورپوراتسياسى جامبىل اتىنداعى قالالىق جاسوسپىرىمدەر كىتاپحاناسىمەن بىرلەسە وتىرىپ، 23 شىلدە كۇنى ساعات 11.00-دە جاپونيا جازۋشىسى يوسيكو كويامانىڭ بالالار مەن بۇلدىرشىندەرگە ارنالعان «سيقىرلى ورىندىق» كىتابىن وقىرمانىنا تانىستىرۋ ءىس- شاراسىن ءوتتى، دەپ حابارلايدى "ادىرنا" ۇلتتىق پورتالى.
«Dozo no isu» كىتابى – العاش رەت 1981 جىلى باسىلىپ شىققان ءارى بىردەن بالالار ادەبيەتى باسىلىمدارىنىڭ اراسىندا بەستسەللەرگە اينالعان، الەمنىڭ 50-دەن استام تىلىنە اۋدارىلعان باسىلىم. «اتامۇرا» باسپاسى بۇل كىتاپتى جاپون تىلىنەن قازاق تىلىنە اۋدارىپ، «سيقىرلى ورىندىق» اتاۋىمەن باسىپ شىعاردى. كىتاپشانى قازاق تىلىنە جاپونيا ازاماتشاسى فاريدا كيشيموتو حانىم اۋدارعان.
كوركەم بەزەندىرىلگەن كىتاپ كىشكەنتاي وقىرماندارعا ءبىر-بىرىنە كومەكتەسكەن مەيىرىمدى ءارى قامقور جانۋارلار تۋرالى اڭگىمەلەيدى. ەرتەگىدە قويان ورىندىق جاساپ، وعان «سيقىرلى ورىندىق» دەپ جازىپ قويادى. شارشاپ كەلە جاتقان ەسەك وتىرىپ دەمالعان سوڭ، ريزاشىلىعىن ءبىلدىرىپ، ەمەن جاڭعاعى تولى سەبەتىن ورىندىققا قويىپ كەتەدى، وسىلايشا، باسقا جانۋارلار اراسىندا يگى ىستەر ەستافەتاسىنىڭ جالعاسۋىنا سەبەپكەر بولادى.
كىتاپ وسكەلەڭ ۇرپاقتى ءبىر-بىرىنە مەيىرىمدى ءارى قامقور بولۋعا تاربيەلەيدى، ەموتسيالىق ينتەللەكت، قىزىعۋشىلىق، ويلاۋ جانە ءوز كوزقاراسىن ءبىلدىرۋ بىلىكتىلىگىن ارتتىرادى. كىتاپ يدەياسى ءبىزدىڭ قوعامنىڭ «اۋىزبىرشىلىك» دەپ اتالاتىن ءداستۇرلى قۇندىلىعىمەن ۇندەسەدى، ءاردايىم ءبىر-بىرىنە كومەكتەسۋگە ۇمتىلۋ – كەز كەلگەن ادامنىڭ ازاماتتىق بورىشى.
بۇل ءىس-شارا جاپونيا باسپاسى وكىلدەرىنىڭ اتىنان چيكا كاننو حانىم مەن ۇلى كوتارونىڭ قاتىسۋىمەن ءوتتى. مەكتەپ جاسىنا دەيىنگى بالالار مەن ولاردىڭ اتا-انالارىنا ارناپ كىتاپتىڭ قازاق جانە جاپون تىلدەرىندەگى نۇسقالارىنان ۇزىندىلەر وقىلادى، سونداي-اق تانىستىرىلىمعا قاتىسىپ وتىرعان جاس وقىرماندارىمىزدىڭ دا ەرتەگى تۋرالى پىكىرلەرىن تىڭداپ، وي ءبولىستى
تانىستىرىلىم جامبىل اتىنداعى قالالىق جاسوسپىرىمدەر كىتاپحاناسىنىڭ وقۋ زالىندا ءوتتى.
جۋرناليست ارمان اۋباكىر شارا بارىسىن تاماشالاپ، بالالار ءۇشىن قۇندى كىتاپتىڭ تۇساۋكەسەرىنە قاتىستى.
