استاناداعى "حان شاتىر" ساۋدا ورتالىعىنىڭ كۇزەت قىزمەتى قازاقتىڭ ۇلتتىق كيىمىن كيگەن بلوگەر قىرمىزى جاندوسقا عيماراتقا قازاقشا كيىممەن كىرۋگە تىيىم سالعان، دەپ حابارلايدى "ادىرنا" ۇلتتىق پورتالى مادەنيەت پورتالىنا سىلتەپ.
بۇل وقيعا تاۋەلسىزدىك كۇنى قارساڭىندا ورىن العان.
قىرمىزى جاندوستىڭ ايتۋىنشا، ول ۇلتتىق كيىممەن قالانىڭ كورىكتى جەرلەرىندە بەينەروليك ءتۇسىرىپ جۇرگەن. بايتەرەك، اق وردا، مەشىت سىندى نىسانداردىڭ ماڭىندا ەش كەدەرگى بولماعانىمەن، "حان شاتىرعا" جەتكەندە كۇزەتشىلەر ونىڭ كيىمىنە بايلانىستى ەسكەرتۋ جاساعان.
"حان شاتىر الدىنا تاۋەلسىزدىك كۇنىنە وراي ۆيدەو تۇسىرۋگە بارعانمىن. باسقا ورىنداردا ەشقانداي ماسەلە تۋىندامادى. بىراق "حان شاتىر" كۇزەتشىلەرى "ماسەلە ءسىزدىڭ كيىمىڭىزدە" دەپ كىرگىزۋدەن باس تارتتى. بۇدان كەيىن ارنايى كىرىپ، ساۋدا ورتالىعىن ءبىر اينالىپ شىقتىم،" – دەيدى بلوگەر قىرمىزى جاندوس.
وقيعا الەۋمەتتىك جەلىدە كەڭىنەن تالقىلانىپ، حالىق اراسىندا رەزونانس تۋدىردى. "حان شاتىر" اكىمشىلىگى بۇل جاعدايعا بايلانىستى بلوگەردەن كەشىرىم سۇراپ، ۆيدەونىڭ جەلىدەن ءوشىرىلۋىن وتىنگەن.
سونىمەن قاتار، Instagram جەلىسىندەگى اتىشۋلى ۆيدەودا "حان شاتىر" اكىمشىلىگى پىكىر قالدىرىپ، ءتۇسىرىلىم وتكىزۋ ءۇشىن الدىن الا كەلىسىم قاجەت ەكەنىن اتاپ ءوتتى:
"حان شاتىر اۋماعىندا كەز كەلگەن تۇسىرىلىمدەردى وتكىزۋ ءۇشىن الدىن الا اكىمشىلىكپەن كەلىسۋ قاجەت", - دەپ جازعان عيماراتتىڭ ءباسپاسوز قىزمەتى.
بۇل جاعداي قوعامدا ۇلتتىق قۇندىلىقتارعا دەگەن قۇرمەت ماسەلەسىن تاعى دا تالقىعا سالدى.
