Astanadaǵy "Han Shatyr" saýda ortalyǵynyń kúzet qyzmeti qazaqtyń ulttyq kıimin kıgen bloger Qyrmyzy Jandosqa ǵımaratqa qazaqsha kıimmen kirýge tyıym salǵan, dep habarlaıdy "Adyrna" ulttyq portaly Mádenıet portalyna siltep.
Bul oqıǵa Táýelsizdik kúni qarsańynda oryn alǵan.
Qyrmyzy Jandostyń aıtýynsha, ol ulttyq kıimmen qalanyń kórikti jerlerinde beınerolık túsirip júrgen. Báıterek, Aq Orda, meshit syndy nysandardyń mańynda esh kedergi bolmaǵanymen, "Han Shatyrǵa" jetkende kúzetshiler onyń kıimine baılanysty eskertý jasaǵan.
"Han Shatyr aldyna Táýelsizdik kúnine oraı vıdeo túsirýge barǵanmyn. Basqa oryndarda eshqandaı másele týyndamady. Biraq "Han Shatyr" kúzetshileri "másele sizdiń kıimińizde" dep kirgizýden bas tartty. Budan keıin arnaıy kirip, saýda ortalyǵyn bir aınalyp shyqtym," – deıdi bloger Qyrmyzy Jandos.
Oqıǵa áleýmettik jelide keńinen talqylanyp, halyq arasynda rezonans týdyrdy. "Han Shatyr" ákimshiligi bul jaǵdaıǵa baılanysty blogerden keshirim surap, vıdeonyń jeliden óshirilýin ótingen.
Sonymen qatar, Instagram jelisindegi atyshýly vıdeoda "Han Shatyr" ákimshiligi pikir qaldyryp, túsirilim ótkizý úshin aldyn ala kelisim qajet ekenin atap ótti:
"Han Shatyr aýmaǵynda kez kelgen túsirilimderdi ótkizý úshin aldyn ala ákimshilikpen kelisý qajet", - dep jazǵan ǵımarattyń baspasóz qyzmeti.
Bul jaǵdaı qoǵamda ulttyq qundylyqtarǵa degen qurmet máselesin taǵy da talqyǵa saldy.
