ەۋرووداق ەلدەرىنىڭ تۇراقتى وكىلدەرى بريۋسسەلدە رەسەيگە قارسى 15-ءشى سانكتسيالار پاكەتىن ماقۇلدادى، دەپ حابارلايدى "ادىرنا" ۇلتتىق پورتالى.
جاڭا سانكتسيالار رەسەيدىڭ مۇناي ەكسپورتىنا باعا شەكتەۋىن اينالىپ ءوتۋ ءۇشىن پايدالانىلاتىن «كولەڭكەلى تانكەر فلوتىمەن» كۇرەسۋگە باعىتتالعان.
«ەو ەلدەرىنىڭ ەلشىلەرى رەسەيدىڭ ۋكرايناعا قارسى اگرەسسياسىنا جاۋاپ رەتىندە 15-ءشى سانكتسيالار پاكەتىن كەلىسىپ بەكىتتى»، – دەپ حابارلاندى ەۋرووداقتىڭ قازىرگى توراعاسى ۆەنگريانىڭ الەۋمەتتىك جەلىدەگى رەسمي پاراقشاسىندا.
بۇل پاكەتتە سانكتسيالىق تىزىمگە جاڭا جەكە تۇلعالار مەن ۇيىمدار قوسىلدى. سونداي-اق، رەسەيگە جانە ءۇشىنشى ەلدەردە ورنالاسقان، رەسەيدىڭ اسكەري جانە تەحنولوگيالىق دامۋىنا جاناما تۇردە ىقپال ەتەتىن سۋبەكتىلەرگە قاتىستى شەكتەۋلەر ەنگىزىلدى.
جاڭا شەكتەۋلەر رەسەيدى قولدايتىن ءۇشىنشى ەلدەرگە تيەسىلى كەمەلەردىڭ قىزمەتىن دە شەكتەيدى.
ەۋروكوميسسيا ءتورايىمى ۋرسۋلا فون دەر ليايەن:
«ەو مەن ونىڭ G7 سەرىكتەستەرى كرەملگە قىسىمدى جالعاستىرۋعا بەكەم. مەن 15-ءشى سانكتسيالار پاكەتىن ماقۇلداۋدى قۇپتايمىن، ول ناقتى رەسەيدىڭ كولەڭكەلى فلوتىنا قارسى باعىتتالعان»، – دەدى.
ەو-نىڭ سىرتقى ساياسات جانە قاۋىپسىزدىك جونىندەگى جوعارى وكىلى كايا كاللاس:
«ءبىز رەسەيگە قاتتى قىسىم كورسەتۋىمىز كەرەك. 15-ءشى سانكتسيالار پاكەتى قابىلدانعانىنا قۋانىشتىمىن»، – دەپ اتاپ ءوتتى.
رەسەي باتىس سانكتسيالارىنا جاۋاپ رەتىندە ەسكى جانە قولدانىستان شىققان تانكەرلەردەن قۇپيا «كولەڭكەلى فلوت» قۇرىپ، مۇناي مەن تاۋارلاردى جاسىرىن تاسىمالداۋدا دەگەن بولجامدار بار.
بۇعان دەيىن ەو رەسەيگە قارسى 14 سانكتسيالار پاكەتىن ەنگىزگەن. ولار ساۋدا، قارجى، ەنەرگەتيكا، ونەركاسىپ، تەحنولوگيا، كولىك، قوسارلى ماقساتتاعى تاۋارلار، ءساندى زاتتار، التىن جانە الماز سەكتورلارىن قامتيدى.
