اقش رەسەيدىڭ ەنەرگەتيكا سالاسىنا قاتاڭ سانكتسيا سالعان سوڭ، ءۇش رەسەيلىك تانكەر قىتاي پورتتارىنا كىرە المادى. ولاردىڭ بورتىندا 2 ميلليون باررەل مۇناي بار، دەپ حابارلايدى “ادىرنا” ۇلتتىق پورتالى DW سايتىنا سىلتەپ.
13 قاڭتاردا Bloomberg اگەنتتىگى اقش سانكتسيالارىنا ۇشىراعان ءۇش رەسەيلىك تانكەردىڭ شاندۋن پروۆينتسياسىنداعى پورتتارعا جاقىنداعان كەزدە توقتاپ، درەيفكە كەتكەنىن حابارلادى. Olia, Mermar جانە Huihai Pacific تانكەرلەرى رەسەيدىڭ قوزمين پورتىنان قىتايعا قاراي 2 ميلليون باررەل مۇناي تاسىمالداپ كەلە جاتقان. بۇل مالىمەتتەرگە Kpler كومپانياسىنىڭ كەمە مونيتورينگى دەرەكتەرى نەگىز بولعان.
تانكەلەردىڭ توقتاپ قالۋىنا سەبەپ — اقش سانكتسيالارىنا ۇشىراعان كەمەلەرگە شاندۋن پورتتار توبىنا كىرۋگە تىيىم سالعان. بۇل پورتتار قىتايدىڭ شىعىسىنداعى ءىرى پورتتاردى بىرىكتىرەدى. بۇعان قاتىستى اقپاراتتى Reuters اگەنتتىگى ءبىر اپتا بۇرىن حابارلاعان بولاتىن.
10 قاڭتاردا اقش-تاعى دجو بايدەننىڭ اكىمشىلىگى رەسەيدىڭ ەنەرگەتيكا سەكتورىنا قارسى ەڭ قاتاڭ سانكتسيالارىن ەنگىزگەن. ولاردىڭ اراسىندا 183 كەمە بار، ولار اقش بيلىگى بويىنشا رەسەيدىڭ "قۇپيا فلوتىنا" جاتادى جانە سانكتسيالاردى اينالىپ وتەتىن مۇناي تاسىمالداۋدا قولدانىلىپ كەلگەن.
رەسەيلىك كەمەلەردىڭ مۇنايدى ءتۇسىرۋ ماسەلەسى باسقا ايماقتاردا دا تۋىنداعان. مىسالى، The Bell باسىلىمىنىڭ مالىمەتىنشە، يسپانيا جاعالاۋىندا گازپروم زاۋىتىنان سپگ پارتياسىن الىپ كەلە جاتقان Cool Rover گاز تاسىمالداۋشىسى زاكىر تاستاعان. گاز تاسىمالداۋشىسى قايدا باعىتتالاتىنى ازىرگە بەلگىسىز.
