Eýroodaq elderiniń turaqty ókilderi Brıýsselde Reseıge qarsy 15-shi sankııalar paketin maquldady, dep habarlaıdy "Adyrna" ulttyq portaly.
Jańa sankııalar Reseıdiń munaı eksportyna baǵa shekteýin aınalyp ótý úshin paıdalanylatyn «kóleńkeli tanker flotymen» kúresýge baǵyttalǵan.
«EO elderiniń elshileri Reseıdiń Ýkraınaǵa qarsy agressııasyna jaýap retinde 15-shi sankııalar paketin kelisip bekitti», – dep habarlandy Eýroodaqtyń qazirgi tóraǵasy Vengrııanyń áleýmettik jelidegi resmı paraqshasynda.
Bul pakette sankııalyq tizimge jańa jeke tulǵalar men uıymdar qosyldy. Sondaı-aq, Reseıge jáne úshinshi elderde ornalasqan, Reseıdiń áskerı jáne tehnologııalyq damýyna janama túrde yqpal etetin sýbektilerge qatysty shekteýler engizildi.
Jańa shekteýler Reseıdi qoldaıtyn úshinshi elderge tıesili kemelerdiń qyzmetin de shekteıdi.
Eýrokomıssııa tóraıymy Ýrsýla fon der Lıaıen:
«EO men onyń G7 seriktesteri Kremlge qysymdy jalǵastyrýǵa bekem. Men 15-shi sankııalar paketin maquldaýdy quptaımyn, ol naqty Reseıdiń kóleńkeli flotyna qarsy baǵyttalǵan», – dedi.
EO-nyń syrtqy saıasat jáne qaýipsizdik jónindegi joǵary ókili Kaııa Kallas:
«Biz Reseıge qatty qysym kórsetýimiz kerek. 15-shi sankııalar paketi qabyldanǵanyna qýanyshtymyn», – dep atap ótti.
Reseı Batys sankııalaryna jaýap retinde eski jáne qoldanystan shyqqan tankerlerden qupııa «kóleńkeli flot» quryp, munaı men taýarlardy jasyryn tasymaldaýda degen boljamdar bar.
Buǵan deıin EO Reseıge qarsy 14 sankııalar paketin engizgen. Olar saýda, qarjy, energetıka, ónerkásip, tehnologııa, kólik, qosarly maqsattaǵy taýarlar, sándi zattar, altyn jáne almaz sektorlaryn qamtıdy.
