فرانتسيا قازاقستاندا اەس قۇرىلىسىن جۇرگىزۋگە كومەكتەسۋگە دايىن. بۇل تۋرالى ەنەرگەتيكا مينيسترلىگىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
مينيسترلىكتىڭ حابارلاۋىنشا، ەنەرگەتيكا ءمينيسترى الماسادام ساتقاليەۆ باستاعان دەلەگاتسيا فرانتسياعا جۇمىس ساپارىمەن بارعان. قازاقستان تاراپى بۇل ەلدىڭ يادرولىق سالاداعى جەتەكشى كومپانيالارىنىڭ باسشىلارىمەن كەزدەسىپ، كەلىسسوزدەر جۇرگىزگەن.
الماسادام ساتقاليەۆ جۇمىس ساپارى بارىسىندا فرانتسيانىڭ اتوم سالاسىنداعى جەتەكشى ۇيىمدارىمەن، سونىمەن بىرگە ءىرى ەنەرگيا ءوندىرۋشى كومپانيالارىمەن، EDF اتوم ەلەكتر ستانتسيالارىنىڭ وپەراتورىمەن، Framatome اتوم ەلەكتر ستانتسيالارىنا ارنالعان جابدىقتاردى ازىرلەۋشى جانە وندىرۋشىسىمەن، Arabelle Solutions اتوم ەلەكتر ستانتسيالارىنا ارنالعان تۋربينالىق جابدىقتار جەتكىزۋشىسىمەن كەلىسسوزدەر جۇرگىزگەن.
بۇدان بولەك اتوم ەلەكتر ستانتسيالارى ءۇشىن ينجينيرينگتىك قىزمەتتەر، جوبالاردى باسقارۋ جانە تسيفرلىق شەشىمدەرگە ماماندانعان Assystem حالىقارالىق كونسالتينگتىك كومپانياسىنىڭ باسشىلارىمەن كەزدەسكەن.
«فرانتسۋز تاراپى قازاقستانعا اتوم ەلەكتر ستانتسياسىن سالۋ جوباسىن جۇزەگە اسىرۋدا قولداۋ كورسەتۋگە دايىن ەكەنىن ءبىلدىردى. وندىرىلەتىن ەلەكتر ەنەرگياسىنىڭ شامامەن 70%-ىن اتوم ەنەرگياسىنان الاتىن فرانتسيا بۇل سالادا الەمدىك كوشباسشى ەلدەر قاتاترىندا»،- دەپ حابارلايدى ءباسپاسوز قىزمەتى.
مينيسترلىك مالىمەتىنشە، EDF اتوم ەلەكتر ستانتسيالارىنىڭ وپەراتورى قازاقستان ءۇشىن يادرولىق تەحنولوگيالاردىڭ الەۋەتتى جەتكىزۋشىلەرىنىڭ قىسقاشا تىزىمىنە ەنگىزىلگەن.
بۇدان بولەك فرانتسيا اەس سالىناتىن بالقاش باسسەينىنە زەرتتەۋ جۇرگىزەدى. فرانتسيانىڭ دامۋ اگەنتتىگى (AFD) جانە فرانتسيانىڭ گەولوگيالىق جانە تاۋ-كەن زەرتتەۋلەر بيۋروسى (BRGM) سۋ رەسۋرستارى جانە يرريگاتسيا مينيسترلىگىمەن بىرلەسىپ، ىلە-بالقاش باسسەينىنە كەشەندى زەرتتەۋ جۇرگىزبەكشى. شەتەلدىك ۇيىمدار جەراستى سۋلارىن زەرتتەۋگە كومەكتەسىپ، جەر استى سۋ رەسۋرستارىنا مونيتورينگ جۇرگىزۋ، بارلاۋ جانە يگەرۋ ماسەلەلەرىن دە زەرتتەمەك.
قازاقستاندا بيىل 6 قازاندا «ءسىز قازاقستاندا اتوم ەلەكتر ستانتسياسىن سالۋعا كەلىسەسىز بە؟» دەگەن ساۋالمەن رەفەرەندۋم وتكىزىلگەن. رەسمي مالىمەت بويىنشا داۋىس بەرگەن سايلاۋشىلاردىڭ 71 پايىزدان استامى اەس قۇرىلىسىمەن كەلىسەتىنىن بىلدىرگەن. ونىڭ قۇرىلىسىن حالىقارالىق كونسورتسيۋم جۇرگىزۋى مۇمكىن ەكەنى ايتىلادى. بىراق رەسەيدىڭ "روساتوم" كومپانياسىنىڭ قازاقستاندا اەس سالۋعا مۇددەللىلىك بىلدىرگەنىن قوعام سىناعان.
