باتىس قازاقستان وبلىسىندا جۇك كولىكتەرىنىڭ جۇرگىزۋشىلەرى قازاقستان-رەسەي شەكاراسىنداعى ۇلكەن كەپتەلىسكە شاعىمداندى، دەپ حابارلايدى "ادىرنا" ۇلتتىق پورتالى "موي گورود" پورتالىنا سىلتەمە جاساپ.
جۇك كولىگىنىڭ جۇرگىزۋشىلەرىنىڭ ايتۋىنشا، شەكارادا كۇتۋ ۋاقىتى كەيدە ءبىر تاۋلىكتەن اسادى.
"ماشتاكوۆو" بەكەتىنە كەلىپ، 16 ساعات تۇردىم. جىگىتتەردىڭ ايتۋىنشا، بۇل قازاقستان شەكاراشىلارىنىڭ جۇمىسىنا بايلانىستى. مەملەكەتتىك كىرىستەر دەپارتامەنتىنىڭ قىزمەتكەرلەرى جەتكىلىكتى. "بەيتاراپ ايماق" تولى. رەسەي بەكەتىنەن ەكى ساعات بويى شىعا المادىم، سەبەبى بەيتاراپ ايماقتا ورىن جوق بولدى. قازاقستان تاراپى رەسەي باعىتىنا التى قاتار كولىك وتكىزىپ، ال "سىرىم" بەكەتىنە تەك ءبىر قاتار عانا جىبەرەدى. سوندىقتان قازاقستانعا قاراي كەزەك پايدا بولادى. بۇل تارتىپسىزدىك قاشان اياقتالادى؟" – دەپ شاعىمداندى جۇرگىزۋشىلەر.
باسىلىمنىڭ مالىمەتىنشە، باتىس قازاقستان وبلىسى بويىنشا ۇقك شەكارا قىزمەتى كەپتەلىستەردىڭ سەبەبى رەسەيدىڭ "ماشتاكوۆو" شەكارا بەكەتىندە ءجۇرىپ جاتقان جوندەۋ جۇمىستارى ەكەنىن ءتۇسىندىردى. جوندەۋ جۇمىستارىن وسى جىلدىڭ 31 جەلتوقسانىندا اياقتاۋ جوسپارلانىپ وتىر.
بۇعان دەيىن رەسەيدىڭ شەكارا بەكەتىندەگى كولىك جولدارىن جوندەۋ جۇمىستارى ءجۇرىپ جاتقانى حابارلانعان بولاتىن.
جوندەۋ جۇمىستارى كەزىندە جۇرگىزۋشىلەرگە "اقساي", "شاعان" جانە "تاسقالا" سەكىلدى بالاما باعىتتاردى پايدالانۋعا كەڭەس بەرىلدى.
