ۋكراينا پرەزيدەنتى ۆلاديمير زەلەنسكي ەلدىڭ باقىلاۋىنداعى اۋماقتاردى ناتو-نىڭ قاۋىپسىزدىك كەپىلدىگىنە الۋ ارقىلى سوعىستىڭ «قىزۋ كەزەڭىن» توقتاتۋعا بولاتىنىن ايتتى، دەپ حابارلايدى "ادىرنا" ۇلتتىق پورتالى Sky News باسىلىمىنا سىلتەپ.
بۇل تۋرالى ۋكراينا باسشىسى 29 قاراشادا مالىمدەدى. زەلەنسكيدىڭ ايتۋىنشا، ۋكراينا ءوز اۋماعىن ناتو «قولشاتىرىنىڭ» استىنا جىلدام ەنگىزسە، ۋاقىت وتە وككۋپاتسيالانعان جەرلەردى ديپلوماتيالىق جولمەن قايتارۋعا مۇمكىندىك تۋادى.
ۋكراينا سولتۇستىكاتلانتيكالىق اليانس قۇرامىنا ەنسە، رەسەي پرەزيدەنتى ۆلاديمير پۋتين باسىپ العان اۋماقتاردى قايتارۋ ءۇشىن جاڭا شابۋىلدار جاساي المايدى. ەگەر ناتو تاراپىنان قاۋىپسىزدىك كەپىلىنسىز سوعىستى «توقتاتۋ» كەلىسىمى جاسالسا، ۋكرايناعا جاڭا قاۋىپ ءتونۋى مۇمكىن.
زەلەنسكي وككۋپاتسيالانعان اۋماقتاردان باس تارتۋ تۋرالى اڭگىمە جوق ەكەنىن اتاپ ءوتتى. ونىڭ پىكىرىنشە، ۋكراينا حالىقارالىق مويىندالعان شەكارالارىندا، ونىڭ ىشىندە اننەكسيالانعان قىرىمدى قوسا العاندا، ناتو-عا مۇشە بولۋى ءتيىس.
«ءبىز ەشقاشان ءوز جەرىمىزدى قانداي دا ءبىر ستاتۋسقا ايىرباستامايمىز. ناتو-نىڭ قولداۋىمەن ۋكراينا بۇل جەرلەردى ديپلوماتيالىق جولمەن قايتارىپ الادى»، – دەدى زەلەنسكي.
بۇل مالىمدەمە اقش-تىڭ بۇرىنعى پرەزيدەنتى دونالد ترامپتىڭ ۋكراينا مەن رەسەي اراسىنداعى سوعىستى توقتاتۋ جوسپارىنا جاۋاپ رەتىندە ايتىلدى. ترامپتىڭ جوسپارى بويىنشا، ۋكراينا ناتو-عا مۇشە بولۋ ءۇشىن كەيبىر اۋماقتاردى رەسەيگە قالدىرۋعا كەلىسە الادى دەگەن پىكىر تالقىلانعان ەدى.
ايتا كەتەيىك، ۋكراينا العاش رەت امەريكالىق ATACMS زىمىراندارى ارقىلى رەسەي اۋماعىنا سوققى بەرگەن بولاتىن.
