16 جاستاعى شەرزات بولاتتىڭ ولىمىنە قاتىستى كۇدىكتى دەپ تانىلعانداردىڭ تۋىستارى بەينە-ۇندەۋ جاساپ، شەرزاتتىڭ اكەسىن جاۋاپقا تارتۋدى سۇرايدى، دەپ حابارلايدى "ادىرنا" ۇلتتىق پورتالى.
بەينەدە:
“ەلىمىزدەن، حالىقىمىزدان كەشىرىم سۇرايمىز. بالالارىمىزدىڭ ارەكەتى ءۇشىن. بىراق ءادىل بولسىن. نۇرقانات تا (شەرزاتتىڭ اعاسى), قارجاۋباي دا (شەرزاتتىڭ اكەسى) جاۋاپقا تارتىلسىن. ءبىز سونى تىلەيمىز. ەكى جاقتى بىردەي قاراڭىزدار”، – دەيدى كۇدىكتىلەردىڭ تۋىستارى.
كۇدىكتىلەردىڭ تۋىستارى وقيعا كەزىندە قارۋدى العاشقى بولىپ شەرزاتتىڭ اعاسى نۇرقانات الىپ شىققانىن ايتادى. سونداي-اق ولار شەرزاتتىڭ سول جەردەگى جىگىتتەردىڭ ءبىرىنىڭ جاعىن سىندىرعان دەپ پىكىر بىلدىرگەن.
“قارۋدى ءبىرىنشى نۇرقانات كولىگىنەن الىپ شىققان. بالالارعا قاراي وق اتقان. بالالار تىنىش تۇرعان جەرىنەن شەرزات مارقۇم ءبىر بالانىڭ جاعىن سىندىردى. ويلاماعان جەردەن ۇرىپ جىبەرگەن. وزدەرى مىلتىق پەن پىشاق الىپ شىققان. سودان جىگىتتەر كوتەرىلىپ كەتكەن. كەشىرىم سۇرايمىز بالالارىمىز ءۇشىن. بىزدىكى دۇرىس ەمەس. بىراق بالالاردى ارانداتپاسا بارلىعى تىنىش شەشىلىپ، بارلىعى ۇيىنە كەتەتىن ەدى. ولار شەرزاتتى ولتىرەمىز دەپ بارعان جوق”، – دەيدى ۆيدەوۇندەۋ جولداعان ايەل.
كۇدىكتىلەردىڭ تۋىستارى قايعىلى وقيعادان ءبۇرىن تالعارداعى دۇكەنگە دارحان ەسىمدى جىگىتتىڭ وزگەلەرلى جيناعانىن ايتادى.
“كافەدە ءوز بەتىمەن وتىرعان بالالار. بارلىعى ءبىر قوڭىراۋدان باستالعان. بارلىعىن دارحان دەگەن بالا باستاعان، ول جەردە دارحاندى تانىمايتىن بالالار دا بار. ول قازىر ۇندەمەي وتىر. ول قارجاۋباي مەن نۇرقاناتتىڭ تانىسى. ءبىز دە سوڭىنا دەيىن بارامىز. دارحان دا جاۋاپقا تارتىلسىن. ويتكەنى ءبارىن شاقىرعان دارحان”، – دەيدى ولار.
بەينەدە ايەل ادام شەرزاتتىڭ اكەسىن حالىقتى دۇرلىكتىرىپ، جالعان اقپارات تاراتتى دەپ ايىپتاۋدا.
“قارجاۋباي باسىنان باستاپ وتىرىك ايتتى. قارجاۋباي پىشاق الىپ كەلدى مە، جىگىتشە مويىنداسىن. ءبىز بالانىڭ قىرقىنا دەيىن ۇندەمەي وتىردىق. قارجاۋبايدى دا قاماسىن. قارجاۋبايدىڭ ايەلى مە، قارىنداسى ما نۇرقانات اتقان وقتاردى جەردەن تەرىپ العان. ول دا جاۋاپكەرشىلىككە تارتىلسىن. اشىق سوت بولسا بارىنە بىردەي بولسىن. ءبىز سونى تالاپ ەتىمىز”، – دەيدى كۇدىكتىلەردىڭ تۋىستارى.
ايتا كەتەيىك، تالعاردا 16 جاستاعى شەرزات بولات كىسى قولىنان قازا تاپقان ەدى. بىرنەشە كۇننەن كەيىن مارقۇمنىڭ ءۇيى دە ورتەنىپ كەتتى.
