16 jastaǧy Şerzat Bolattyŋ ölımıne qatysty küdıktı dep tanylǧandardyŋ tuystary beine-ündeu jasap, Şerzattyŋ äkesın jauapqa tartudy sūraidy, dep habarlaidy "Adyrna" ūlttyq portaly.
Beinede:
“Elımızden, halyqymyzdan keşırım sūraimyz. Balalarymyzdyŋ äreketı üşın. Bıraq ädıl bolsyn. Nūrqanat ta (Şerzattyŋ aǧasy), Qarjaubai da (Şerzattyŋ äkesı) jauapqa tartylsyn. Bız sony tıleimız. Ekı jaqty bırdei qaraŋyzdar”, – deidı küdıktılerdıŋ tuystary.
Küdıktılerdıŋ tuystary oqiǧa kezınde qarudy alǧaşqy bolyp Şerzattyŋ aǧasy Nūrqanat alyp şyqqanyn aitady. Sondai-aq olar Şerzattyŋ sol jerdegı jıgıtterdıŋ bırınıŋ jaǧyn syndyrǧan dep pıkır bıldırgen.
“Qarudy bırınşı Nūrqanat kölıgınen alyp şyqqan. Balalarǧa qarai oq atqan. Balalar tynyş tūrǧan jerınen Şerzat marqūm bır balanyŋ jaǧyn syndyrdy. Oilamaǧan jerden ūryp jıbergen. Özderı myltyq pen pyşaq alyp şyqqan. Sodan jıgıtter köterılıp ketken. Keşırım sūraimyz balalarymyz üşın. Bızdıkı dūrys emes. Bıraq balalardy arandatpasa barlyǧy tynyş şeşılıp, barlyǧy üiıne ketetın edı. Olar Şerzatty öltıremız dep barǧan joq”, – deidı videoündeu joldaǧan äiel.
Küdıktılerdıŋ tuystary qaiǧyly oqiǧadan büryn Talǧardaǧy dükenge Darhan esımdı jıgıttıŋ özgelerlı jinaǧanyn aitady.
“Kafede öz betımen otyrǧan balalar. Barlyǧy bır qoŋyraudan bastalǧan. Barlyǧyn Darhan degen bala bastaǧan, ol jerde Darhandy tanymaityn balalar da bar. Ol qazır ündemei otyr. Ol Qarjaubai men Nūrqanattyŋ tanysy. Bız de soŋyna deiın baramyz. Darhan da jauapqa tartylsyn. Öitkenı bärın şaqyrǧan Darhan”, – deidı olar.
Beinede äiel adam Şerzattyŋ äkesın halyqty dürlıktırıp, jalǧan aqparat taratty dep aiyptauda.
“Qarjaubai basynan bastap ötırık aitty. Qarjaubai pyşaq alyp keldı me, jıgıtşe moiyndasyn. Bız balanyŋ qyrqyna deiın ündemei otyrdyq. Qarjaubaidy da qamasyn. Qarjaubaidyŋ äielı me, qaryndasy ma Nūrqanat atqan oqtardy jerden terıp alǧan. Ol da jauapkerşılıkke tartylsyn. Aşyq sot bolsa bärıne bırdei bolsyn. Bız sony talap etımız”, – deidı küdıktılerdıŋ tuystary.
Aita keteiık, Talǧarda 16 jastaǧy Şerzat Bolat kısı qolynan qaza tapqan edı. Bırneşe künnen keiın marqūmnyŋ üiı de örtenıp kettı.
Ūqsas jaŋalyqtar
