16 jastaǵy Sherzat Bolattyń ólimine qatysty kúdikti dep tanylǵandardyń týystary beıne-úndeý jasap, Sherzattyń ákesin jaýapqa tartýdy suraıdy, dep habarlaıdy "Adyrna" ulttyq portaly.
Beınede:
“Elimizden, halyqymyzdan keshirim suraımyz. Balalarymyzdyń áreketi úshin. Biraq ádil bolsyn. Nurqanat ta (Sherzattyń aǵasy), Qarjaýbaı da (Sherzattyń ákesi) jaýapqa tartylsyn. Biz sony tileımiz. Eki jaqty birdeı qarańyzdar”, – deıdi kúdiktilerdiń týystary.
Kúdiktilerdiń týystary oqıǵa kezinde qarýdy alǵashqy bolyp Sherzattyń aǵasy Nurqanat alyp shyqqanyn aıtady. Sondaı-aq olar Sherzattyń sol jerdegi jigitterdiń biriniń jaǵyn syndyrǵan dep pikir bildirgen.
“Qarýdy birinshi Nurqanat kóliginen alyp shyqqan. Balalarǵa qaraı oq atqan. Balalar tynysh turǵan jerinen Sherzat marqum bir balanyń jaǵyn syndyrdy. Oılamaǵan jerden uryp jibergen. Ózderi myltyq pen pyshaq alyp shyqqan. Sodan jigitter kóterilip ketken. Keshirim suraımyz balalarymyz úshin. Bizdiki durys emes. Biraq balalardy arandatpasa barlyǵy tynysh sheshilip, barlyǵy úıine ketetin edi. Olar Sherzatty óltiremiz dep barǵan joq”, – deıdi vıdeoúndeý joldaǵan áıel.
Kúdiktilerdiń týystary qaıǵyly oqıǵadan búryn Talǵardaǵy dúkenge Darhan esimdi jigittiń ózgelerli jınaǵanyn aıtady.
“Kafede óz betimen otyrǵan balalar. Barlyǵy bir qońyraýdan bastalǵan. Barlyǵyn Darhan degen bala bastaǵan, ol jerde Darhandy tanymaıtyn balalar da bar. Ol qazir úndemeı otyr. Ol Qarjaýbaı men Nurqanattyń tanysy. Biz de sońyna deıin baramyz. Darhan da jaýapqa tartylsyn. Óıtkeni bárin shaqyrǵan Darhan”, – deıdi olar.
Beınede áıel adam Sherzattyń ákesin halyqty dúrliktirip, jalǵan aqparat taratty dep aıyptaýda.
“Qarjaýbaı basynan bastap ótirik aıtty. Qarjaýbaı pyshaq alyp keldi me, jigitshe moıyndasyn. Biz balanyń qyrqyna deıin úndemeı otyrdyq. Qarjaýbaıdy da qamasyn. Qarjaýbaıdyń áıeli me, qaryndasy ma Nurqanat atqan oqtardy jerden terip alǵan. Ol da jaýapkershilikke tartylsyn. Ashyq sot bolsa bárine birdeı bolsyn. Biz sony talap etimiz”, – deıdi kúdiktilerdiń týystary.
Aıta keteıik, Talǵarda 16 jastaǵy Sherzat Bolat kisi qolynan qaza tapqan edi. Birneshe kúnnen keıin marqumnyń úıi de órtenip ketti.
