«قازاق انيماتسيا» شىعارماشىلىق بىرلەستىگىنىڭ اينالاسىنداعى داۋ ماجىلىستە دە قوزعالدى، دەپ حابارلايدى "ادىرنا" ۇلتتىق پورتالى.
كرەاتيۆتى يندۋستريانى دامىتۋعا ارنالعان زاڭ جوباسىن تالقىلاعان دەپۋتاتتار توبى «اتالمىش شىعارماشىلىق ۇجىمدى «قازاقفيلمنەن» بولەك شىعارۋ ماسەلەسىن تالقىعا سالدى.
پروديۋسەر الماس جالي «قازاق انيماتسياسى» بىرلەستىگىن تاۋەلسىز ۇيىم ەتۋدى ۇسىندى. مادەنيەت جانە اقپارات مينيسترلىگىنىڭ اتىنان كەلگەن ماماندار بۇل ۇسىنىسقا ناقتى جاۋاپ بەرمەدى. ءماجىلىستىڭ الەۋمەتتىك-مادەني دامۋ كوميتەتىنىڭ توراعاسى اسحات ايماعامبەتوۆ ۆەدومستۆو وكىلدەرىنىڭ بۇل تالقىلاۋعا ناقتى ۇستانىمسىز كەلگەنىنەن وكىنىش ءبىلدىردى. كرەاتيۆتى يندۋستريانى دامىتۋدى كوزدەيتىن زاڭ جوباسىن ازىرلەۋشى جۇمىس توبىنىڭ جەتەكشىسى نارتاي سارسەنعاليەۆ "قازاقفيلم" ماسەلەسەنى قاتىستى پىكىر ءبىلدىردى.
«انيماتسيا وكىلدەرى «قازاق انيماتسيا» شىعارماشىلىق بىرلەستىگىن «قازاقفيلمنەن» بولەك شىعارىڭىزدار دەپ وتىر. شىنىن ايتساق، ءبىز انيماتسيامىزدىڭ دەڭگەيى كەنجە قالعانىن بىلەمىز. سالا مامانىنىڭ ءوزى ءتىپتى «بولاشاقپەن» وقىپ كەلگەن مامانداردى قوسىمشا وقىتۋ كەرەك دەگەندى ايتتى. سوندا بىزدە لايىقتى مامانداردى شەتەلگە جىبەرۋ ءۇشىن ىرىكتەۋدە پروبلەما بار دەگەن ءسوز»، - دەيدى دەپۋتات.
سونداي-اق نارتاي ارالبايۇلى «قازاق انيماتسياسى» بىرلەستىگى قازاقفيلمنىڭ» قۇرامىندا بولعان جىلدارى ايتارلىقتاي ناتيجە كورسەتپەگەنىن ايتادى.
«وسى ۋاقىتتىڭ ىشىندە ناتيجە بەرمەگەنىن كورىپ وتىرمىز. دەمەك ونى بولەك شىعارۋ كەرەك. مەن بۇل ۇسىنىستى دۇرىس دەپ ەسەپتەيمىن. سوندا ولار مەملەكەتتىڭ موينىنا سالماق سالا بەرمەي، وزدەرى دە قاراجات تابۋعا ارەكەتتەنەر ەدى. ماماندار ايتتى، رەسەي مەن ۋكراينادان قانشاما انيماتورلار كەلىپ جاتىر؟! 3D انيماتسيا جاسايتىن ماماندار سونىڭ كوبى. ولار ءبىزدىڭ بيۋدجەتتىڭ اۋقىمدى بولىگىن اكەتىپ جاتىر. سوندىقتان ءبىز باسەكەگە قابىلەتتى مامانداردى دايىنداۋىمىز كەرەك. مينيسترلىك ارنايى قور قۇرىپ، سونىڭ ىشىنە كىرگىزسەك دەگەندى ايتتى. ءبىز ونداي قوردى قولدامايمىز. ويتكەنى الماس جالي دەگەن كرەاتوردىڭ ءوزى ايتىپ وتىرعانى دۇرىس. Astana hub سياقتى دايىن پلاتفورما تۇرعاندا نەگە جاڭا قور قۇرىپ، «وپەراتور روپ» سياقتى ءتيىمسىز مەكەمە اشقاننىڭ نە قاجەتى بار؟ قازاق انيماتسياسىن قور ارقىلى دامىتامىز دەۋ قاشپاعان سيىردىڭ ۋىزىنان دامەتكەنمەن بىردەي. ومىرباقي ءبىر كومپانيانىڭ قۇرامىندا بولدى، ناتيجە بولمادى. مۇمكىن جەكە جىبەرىپ كورەرمىز؟ زاڭ جوباسىن كەشە عانا الدىق. سول كەزدە وسى ۇسىنىستى ەنگىزەمىز»، - دەيدى نارتاي سارسەنعاليەۆ.
ايتا كەتەيىك، 16 شىلدەدە 90 جىلدىق تاريحى بار، قازاق كينوسىنىڭ قارا شاڭىراعى بولعان "قازاقفيلمدە" اي سايىنعى جالاقىلارىن بىر جىل بويى الا الماي كەلگەن انيماتسيالىق فيلم ماماندارى نارازىلىققا شىققان بولاتىن.
