جاقىندا ءال-فارابي اتىنداعى قازۇۋ-ءنىڭ جۋرناليستيكا فاكۋلتەتى باسپاگەرلىك-رەداكتورلىق جانە ديزاينەرلىك ونەر كافەدراسىنىڭ ۇيىمداستىرۋىمەن «اتامۇرا» كورپورتسياسىنىڭ پرەزيدەنتى راقىمعالي قۇل-مۇحاممەد پەن «اتامۇرا» باسپاسىنىڭ جەتەكشى رەداكتورلارى رايحان رايباەۆا، نازيرا بەكحوجاەۆامەن كەزدەسۋ ءوتتى.
«اتامۇرا» باسپاسى 1992 جىلى 4 اقپاندا قۇرىلىپ، قازىرگى تاڭدا 1000-عا جۋىق قىزمەتكەر جۇمىس ىستەيتىن الدىڭعى قاتارلى باسپا.
كەزدەسۋدە جۋرناليستيكا فاكۋلتەتى مەن «اتامۇرا» باسپاسىنىڭ اراسىنداعى شىعارماشىلىق بايلانىس تۋرالى ماسەلەلەر قوزعالىپ، ستۋدەنتتەردىڭ باسپاعا قاتىستى سۇراقتارىنا جاۋاپ بەرىلدى. سونىمەن قاتار وقۋلىقتاردى ورىندى، ورىنسىز سىنايتىندار جايلى اشىق ءسوز قوزعالدى. «اتامۇرا» باسپاسى وقۋلىقتان باسقا پوليگرافيالىق ءونىمنىڭ بارلىعىن شىعارادى.
«اتامۇرا» باسپا كورپوراتسياسىنىڭ پرەزيدەنتى راقىمعالي ابرارۇلى:
– بۇگىندە «اتامۇرا» باسپاسى كىتاپ شىعارۋدا بىرنەشە باعىتتا جۇمىس ىستەپ جاتىر، دالىرەك ايتقاندا، 9 باعىتتا. مىنە، مەن وسىلارعا جەكە-جەكە توقتالىپ وتەيىن دەپ تۇرمىن!
ەڭ العاشقى ءارىپ «الىپپەدەن» باستالادى، ودان كەيىن «انا تىلىمەن» جالعاسادى. سوندىقتان ءبىز «الىپپەنى» اياقتاپ، «انا ءتىلىن» وقىپ جۇرگەن ءبىرىنشى سىنىپتىڭ بالاسىنا قانداي كىتاپ وقىتۋ كەرەكتىگىن كوپ ويلانا كەلىپ، بۋىنعا ءبولىپ وقۋعا ىڭعايلى كىتاپتىڭ اتاۋىن دا «الىپپەگە» جاقىنداتىپ «الىپپە اڭگىمەلەرى» دەگەن اتپەن بۇلدىرشىندەرىمىزدىڭ العاشقى كىتابى رەتىندە ۇسىندىق. ودان كەيىن تومەندەگى سەريالار جالعاسادى.
- الىپپە; «الىپپە اڭگىمەلەرى»، «بۇركىتتىڭ بالاپانى»، «بال بۇلاق» جاس بۇلدىرشىندەرگە ارنالعان كىتاپشالار، «اتامۇرانىڭ» العاشقى سەرياسى «مەنىڭ العاشقى كىتاپشام» دەپ اتالادى.
- «اتامۇرا» مەكتەپ كىتاپحاناسى» سەرياسىمەن شىققان كوركەم شىعارمالار، «بالالار پوەزياسىنىڭ انتولوگياسى» جانە «بالالار پروزاسىنىڭ انتولوگياسى» جيناقتارى.
- «اتامۇرا» كىتاپحاناسى» كوركەم ادەبيەتتەر سەرياسى.
- قازاقتىڭ ۇلى دانىشپانى اباي قۇنانبايۇلىنا ارنالعان باسىلىمدار.
- «اتامۇرا» باسپاسىنىڭ عىلىمي باسىلىمدارى (5 تومدىق «قازاقستان تاريحى» (ورىسشا، قازاقشا), «ابىلاي حان»، «اتتيلا»، «قوبىز سارىنى»).
- شەتەل باسپالارىمەن بىرلەسىپ شىعارعان باسىلىمدار، تمد جازۋشىلارىنىڭ اۋدارما كىتاپتارى.
- مەكتەپ وقۋشىلارىنا ارنالعان ەنتسيكلوپەديالار.
- اعىلشىن ءتىلىن ۇيرەتەتىن بالالارعا ارنالعان باسىلىمدار.
- قازاقتىڭ سالت-داستۇرىمەن ۇلتتىق قۇندىلىقتارىنا ارنالعان باسىلىمدار.
30 جىلدان استام «اتامۇرادا» رەداكتورلىق جۇمىستىڭ قىزىعى مەن شىجىعىن باسىنان وتكەرگەن رايحان رايباەۆا رەداكتور بولعىسى كەلەتىن ستۋدەنتتەرمەن ءوز تاجىريبەسىن ءبولىستى. ونىمەن قوسا، الەۋمەتتىك جەلىدەگى وڭدى-سولدى وقۋلىققا قاتىستى ايتىلىپ جاتقان پىكىرلەرگە توقتالىپ:
– «3-سىنىپقا ارنالعان «ادەبيەتتىك وقۋ» وقۋلىعىن مىسالعا الايىن. كەيبىر ادامدار بۇل وقۋلىقتا بەرىلگەن وقۋشىلاردىڭ لوگيكاسىن جەتىلدىرۋگە ارنالعان بەلگىلى اقىن ەرتاي اشىقباەۆتىڭ «عالامتور تۋرالى» ولەڭىن تۇسىنبەي، قاتە دەپ، ورىنسىز سوزدەرمەن بالاعاتتاپ، الەۋمەتتىك جەلىدەگى ءوز پاراقشالارىندا ءبولىستى. سوڭعى ۋاقىتتا وتاندىق وقۋلىقتارعا قاتىستى ءارتۇرلى ورىندى-ورىنسىز وي-پىكىرلەر الەۋمەتتىك جەلىدە ءجيى جاريالاناتىن بولدى. ءيا، تەك الەۋمەتتىك جەلىلەردە. ءداستۇرلى ءباسپاسوز بۇل تاقىرىپقا كوپ بارا بەرمەيدى. سوندىقتان جۇرتشىلىق الەۋمەتتىك جەلىدەگى جەل سوزگە سەنىپ، كەز كەلگەن اقپاراتتىڭ انىق-قانىعىنا كوز جەتكىزبەستەن، دۇرىس بولسا دا، بۇرىس بولسا دا، شىندىق دەپ قابىلداپ قالىپ جاتادى. الايدا مۇنداي سىن-ەسكەرتپەلەردىڭ 70 پايىزى شىندىققا جاناسپايدى. مەنىڭشە، سىن ايتۋ ءۇشىن سىن دا شىندىققا جاناسۋى كەرەك»، – دەپ ويىن ادەمى قورىتىندىلادى.
ساتيريك، جۋرناليست ەرماحان شايحىۇلى وسى پىكىرگە قاتىستى ويىن ايتىپ، بۇل ولەڭ جولدارىن «تۇرمىستىق پارودياعا» جاتقىزۋعا بولاتىنىنا توقتالدى.
نازيرا بەكحوجاەۆا:
– ەلەكتروندى وقۋلىق بالالاردىڭ اۋىر سومكەسىن جەڭىلدەتۋ ماقساتىندا قۇراستىرىلعانىن ءارى وسىنداي وقۋلىقتىڭ 171 تۇرىمەن تانىستىرۋدى ءجون كورىپ وتىرمىن. «الىپپە» وقۋلىعىندا ۇلتتىق كيىم كيگەن ەكى بالا ارىپتەردى ەگجەي-تەگجەيلى تۇسىندىرەدى. بالالار ءۇشىن، ۇستازدار ءۇشىن دە تاپتىرماس قۇرال ەكەندىگى ايتپاسا دا تۇسىنىكتى»، – دەپ كونفەرەنتسيا بارىسىندا ۇتقىر ويىمەن كوپشىلىكتىڭ نازارىن وزىنە اۋداردى.
جيىن سوڭىندا «اتامۇرا» كورپوراتسياسىنىڭ پرەزيدەنتى راقىمعالي قۇل-مۇحاممەد 100 كوركەم-ادەبي كىتاپتى جۋرناليستيكا فاكۋلتەتىنە سىيعا تارتتى. جۋرناليستيكا فاكۋلتەتىنىڭ دەكانى قانات اۋەسباي ريزاشىلىعىن بىلدىرە وتىرىپ، كىتاپتار ءار دۇيسەنبى سايىن «ۇزدىك ستۋدەنت»، «ۇزدىك وقىتۋشى» نوميناتسياسى بويىنشا سىيعا بەرىلىپ وتىراتىنىنان حاباردار ەتتى.
ۇلبوسىن نامازباي
