اتىراۋ وبلىسىندا اڭعا شىققان ەر ادام ابايسىزدا قاسىنداعى سەرىگىن اتىپ ءولتىرىپ العانى تۋرالى حابارلاما تارادى. قايعىلى وقيعانى وبلىستىق پوليتسيا دەپارتامەنتى راستادى، دەپ حابارلايدى “ادىرنا”.
پوليتسيا دەپارتامەنتىنىڭ مالىمەتىنشە، قايعىلى جاعداي قىزىلقوعا اۋدانىندا 6 جەلتوقسانعا قاراعان ءتۇنى بولعان. 36 جاستاعى ەر ادام 39 جاستاعى سەرىگىن ابايسىزدا اتىپ ءولتىردى. وقيعا اققورا اۋىلىنا جاقىن جەردە، جاسقايراتتان 30 كم قاشىقتىقتا، شامامەن 02:30 كەزىندە بولعان.
الدىن الا مالىمەت بويىنشا، ەر ادامدار اڭشىلىققا شىققان جانە وعان دەيىن الكوگولدىك ىشىمدىك ىشكەن. قارۋ قولدانۋ كەزىندەگى قاتەلىك ادام ولىمىنە اكەلگەن.
قازىر وقيعا بويىنشا تەرگەۋ جۇرگىزىلىپ جاتىر، بارلىق ءمان-جاي انىقتالىپ جاتىر.
«قىزىلقوعا اۋدانى پوليتسيا ءبولىمى اققورا ەلدى مەكەنىنىڭ ماڭىندا ورىن العان قىلمىسقا قاتىستى ادام ءولتىرۋ دەرەگىمەن قىلمىستىق ءىس قوزعادى. 36 جاستاعى كۇدىكتى قاماۋعا الىنىپ، كەشەندى تەرگەۋ امالدارى جۇرگىزىلۋدە. وزگە اقپارات تەرگەۋ مۇددەسىنە سايكەس جاريالاۋعا جاتپايدى»، – دەلىنگەن وبلىستىق پد-نىڭ اگەنتتىك تىلشىسىنە بەرگەن مالىمەتىندە.
