بۇگىن 19-مۋسىم كۇنى الماتى قالاسىندا ورنالاسقان ءال-فارابي اتىنداعى قازاق ۇلتتىق ۋنيۆەرسيتەتىنىڭ الدىندا 11-سىنىپ وقۋشىسى كوز جۇمدى.
كۋاگەرلەردىڭ سوزىنشە، وقيعا 16:00 شاماسىندا ۋنيۆەرسيتەت اۋماعىندا ورىن العان. الماتى قالاسىنداعى جالعىز ۇبت تاپسىرۋ ورتالىعى بولىپ سانالاتىن قازاق ۇلتتىق ۋنيۆەرسيتەتىنەن سىناق تاپسىرىپ شىققان. 11-سىنىپتى اياقتاعان وقۋشىلار سۋبۇرقاقتا سۋ شاشىپ ويناعان كورىنەدى. ويىن بارىسىندا بالانىڭ اياعى تايىپ قۇلاعان.
بەيرەسمي مالىمەتتەردە، سۋبۇرقاق ىشىندەگى ەلەكتر توعى قاتتى سوعىپ بالانىڭ جۇرەگى توقتاپ قالعان كورىنەدى. مارقۇمنىڭ جانىنداعى ەكى دوسى كومەك كورسەتۋگە تىرىسقان. الايدا قايتىس بولعان وقۋشىنىڭ دەنەسى اۋىر بولعاندىقتان سۋدان الىپ شىعۋ وڭايعا سوقپاپتى. جاسوسپىرىمدەر العاشقى كومەك كورسەتۋگە ۇلگەرمەگەن دەگەن اقپارات تاراۋدا.
جەدەل-جارەم كولىگى قازۇۋ قالاشىعىنا كىرەتىن تىكە جول بولماعان سوڭ، ۇزاق تەجەلىپ تۇرۋعا تۋرا كەلدى. وقيعا ورىن العان سوڭ شامامەن 1 ساعاتتا جەدەل-جاردەم مەن ءتارتىپ ساقتاۋ قىزمەتكەرلەرى كەلىپ جەتكەن. ءمايىتتىڭ ءۇستىن جاۋىپ، تەكسەرىستەن وتكىزگەن سوڭ ۋنيۆەرسيتەت اۋماعىنان الىپ كەتتى. مارقۇمنىڭ اعاسى دا وقيعا ورنىنا جەتىپ، ءوز كوزىمەن كوردى.
باق مالىمەتىنشە، ءال-فارابي اتىنداعى قازاق ۇلتتىق ۋنيۆەرسيتەتى اۋماعىندا قايعىلى وقيعا الدىندا مەكتەپ تۇلەكتەرى سۋبۇرقاقتا شومىلۋعا بەل بۋعان. ازىرگە ءولىمنىڭ ناقتى سەبەبى نە بولعانى بەلگىسىز.
كوز جۇمعان بالانىڭ ۋنيۆەرسيتەت ستۋدەنتى ەمەستىگى ايتىلدى. قايعىلى وقيعاعا قاتىستى قالالىق پد:
«بۇل فاكتى بويىنشا تەرگەۋ باستالدى. سوت-مەديتسينالىق ساراپتاما تاعايىندالدى»، - دەپ جاۋاپ بەردى.
فاريزا نۇربولاتقىزى
