اباي وبلىسىنىڭ ءۇرجار اۋدانىنداعى ءۇرجار اۋىلىندا 2001 جىلى تۋعان جاس جىگىتتىڭ كىسى قولىنان قازا تاپقانى انىقتالدى.
2024 جىلدىڭ 30 قاڭتارىندا اباي وبلىسىندا رايبەك راحات ەسىمدى ەر ادام اسا قاتىگەزدىكپەن ولتىرىلگەن.
اقپاراتتى باق–قا جەتكىزگەن جىگىتتىڭ تۋعان اپكەسى – اسەم.
«2001 جىلى تۋعان باۋىرىم اسا جاۋىزدىقپەن، قاتالدىقپەن ءولتىرىلدى. وعان 22 پىشاق جاراقاتى سالىنعان!!! 29.01.24 كۇنى اسكەري كوميسسارياتتا ۋردجار اۋداندىق قورعانىس ىستەرى باسقارماسىنىڭ (ودو) 6-عا جۋىق قىزمەتكەرىنىڭ قاتىسۋىمەن كىسى ءولىمى ورىن الدى»، - دەلىنگەن اسەمنىڭ جەلىدە جاريالاعان حابارلاماسىندا.
اسەمگۇل قاناتقىزى «ادىرنا» تىلشىسىنە بەرگەن سۇحباتىندا وقيعانىڭ ءمان- جايىن ايتتى.
- قايعىلى تراگەديا ورىن العان كۇن ەسىڭىزدە مە؟
- ءيا، ءىنىمنىڭ دەنەسىنىڭ ساۋ جەرى بولمادى. وعان 22 جەرىنەن پىشاق جاراقاتىن سالىپ، اسا قاتىگەزدىكپەن ولتىرگەن. قايعىلى وقيعا مەملەكەتتىك قۇپيالاردى ساقتايتىن رەجيمدىك نىسان بولىپ تابىلاتىن جەردە بولعان. سپيرتتىك ىشىمدىكتەرمەن داستارحان جايىلىپ، ءىنىمنىڭ ارىپتەستەرى اراسىندا كىشىگىرىم وتىرىس بولعان. الايدا وتىرىس بارىسىندا جانجال تۋىپ، كەيىننەن عيماراتتىڭ سىرتىندا ءىنىمدى ولتىرگەن.
- تەرگەۋ بارىسى قالاي ءجۇرىپ جاتىر؟ كىنالىلەر تەرگەلىپ جاتىر ما؟
- تەرگەۋ 7 اي بويى جۇرگىزىلدى، بىراق ءالى كۇنگە دەيىن مەنىڭ باۋىرىمنىڭ ولتىرىلۋىنە قاتىسى بارلارعا قاتىستى ادىلدىك پەن جازانى تالاپ ەتە الماي وتىرمىز. تەرگەۋ بارىسىندا ءبىزدىڭ ويىمىزشا، زاڭ بۇزۋشىلىقتار ورىن العان. كىنالى تەك ءبىر ادام رەتىندە تانىلدى. بىراق اسكەري كوميسساريات قىزمەتكەرلەرى جاسىرىنىپ تۇر! تەرگەۋدە كوپتەگەن ساتتەر ەسكەرىلمەي قالدى! قىلمىس پىشاقپەن جاسالعان. الايدا قىلمىستىڭ ىزدەرى تەكسەرىلمەدى، بەينە جازبالارداعى بەينەلەر الىنباعان. كوپتەگەن كۇدىكتىلەردى جاسىرۋ بويىنشا ءىس قوزعالمادى. پوليتسەي قىزمەتكەرى ابايسىزدا مەنىڭ باۋىرىمنىڭ ءمايىتى تابىلعان جەردەگى فوتو مەن ۆيدەونى WhatsApp قوسىمشاسىندا تاراتقان. بۇل وتە سۇمدىق!
اسقان قاتىگەزدىكپەن ولتىرىلگەن ەر ادام اۋداندىق كوميسسارياتتا جۇمىس ىستەگەن. مارقۇم بولعان جىگىت نەبارى 10 كۇن جۇمىس ىستەپ ۇلگەرگەن.
- ول (مارقۇم) اسكەري كوميسسارياتتا جۇمىسقا 10 كۇن بۇرىن كىرگەن. ول اسكەري كافەدرانى بىتىرگەن. ماماندىعى - تەحنولوگ،" - دەيدى مارقۇمنىڭ اپكەسى.
سونداي-اق، مارقۇم راحاتتىڭ اپكەسى قىلمىستىق ىسكە قاتىستى سوت وتىرىسى بىرنەشە رەت كەيىنگە شەگەرىلگەنىن حابارلادى.
مۇنىڭ سەبەبىن سۇراپ، ىسكە قاتىستى اباي وبلىسى سەمەي قالالىق اۋدانارىلىق سوتىنا سۇراۋ سالدىق. رەسمي ورگان ءۇش جۇمىس كۇنى ىشىندە جاۋاپ جولدايتىنىن حابارلادى. بۇگىن ءۇشىنشى كۇن، ازىرگە جاۋاپ جوق.
سىمبات ناۋحان
«ادىرنا» ۇلتتىق پورتالى
