2024 جىلعى 17 قازاندا بريۋسسەلدە وتكەن بەرلين ەۋرازيالىق كلۋبىنىڭ (بەك) 41-ءشى وتىرىسىندا «قازاقستان مەن ەو/گەرمانيا اراسىنداعى ەكونوميكالىق ىنتىماقتاستىقتا ESG قاعيداتتارىن ساقتاۋ» ماسەلەسى تالقىلاندى,دەپ حابارلايدى «ادىرنا» ۇلتتىق پورتالى.
وتىرىستا قازاقستاندىق جانە ەۋروپالىق مەملەكەتتىك ورگاندار، بيزنەس جانە قارجى ينستيتۋتتارىنىڭ وكىلدەرى قاتىستى.
قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى رومان ۆاسيلەنكو گەرمانيا فەدەرالدىق كانتسلەرى ولاف شولتستىڭ استاناعا ساپارى ناتيجەسىندە ەكى ەل اراسىنداعى ىسكەرلىك سەرىكتەستىكتىڭ نىعايعانىن اتاپ ءوتتى. ساپار بارىسىندا 41 قۇجاتقا قول قويىلعانى حابارلاندى.
ۆاسيلەنكو ەۋروپالىق ارىپتەستەردى قازاقستان ەكونوميكاسىنا ەكولوگيالىلىق قاعيداتتارىن ەسكەرە وتىرىپ ينۆەستيتسيالاردى ارتتىرۋعا شاقىردى. قازاقستان 2060 جىلعا قاراي كليماتتىق بەيتاراپتىققا جەتۋدى ستراتەگيالىق ماقسات ەتىپ وتىر.
ەۋروپالىق كوميسسيا وكىلى سيريل لۋازەل قازاقستاننىڭ جاسىل سۋتەك ءوندىرىسى جوبالارىن جانە جاھاندىق مەتان ۋادەسىنە قوسىلۋىن قولدادى. وتىرىستا ەلەكتر جەلىلەرىنىڭ ءوزارا بايلانىسىن دامىتۋ قاجەتتىلىگى دە اتالىپ ءوتتى.
تالقىلاۋعا قازاقستاننىڭ ەكولوگيا جانە تابيعي رەسۋرستار ۆيتسە-ءمينيسترى مانسۇر وشۋرباەۆ، بەك كونسۋلتاتيۆتىك كەڭەسىنىڭ توراعاسى پيتەر تيلس جانە باسقا ساراپشىلار قاتىستى. ESG قاعيداتتارىنا نەگىزدەلگەن تۇراقتى بيزنەسكە كوشۋ ەكونوميكانىڭ باسەكەگە قابىلەتتىلىگىن ارتتىرۋدا ماڭىزدى ءرول اتقاراتىنى اتاپ كورسەتىلدى.
