ەۋروپادا 8-9 مامىردا اتاپ وتىلگەن ەكىنشى دۇنيەجۇزىلىك سوعىستىڭ اياقتالۋىنا بايلانىستى بەرلين پوليتسياسى قالاداعى جانە ونىڭ ماڭىنداعى اۋداندارداعى كەڭەستىك ەسكەرتكىشتەردىڭ جانىندا رەسەيلىك رامىزدەرگە تىيىم سالدى، دەپ حابارلايدى “ادىرنا” ۇلتتىق پورتالى Deutsche Welle سايتىنا سىلتەپ.
وندا رەسەي تۋلارى، گەورگي لەنتالارى، فورمالار، وردەندەر، اسكەري جانە مارش اندەرى، سونداي-اق رەسەيدىڭ ۋكرايناعا قارسى سوعىسىن دارىپتەيتىن رامىزدەر، سونىڭ ىشىندە Z سيمۆولىنا تىيىم سالىندى. بۇل تۋرالى سارسەنبى، مامىردىڭ 7-ءسى كۇنى كەشكە شىققان پوليتسيا بۇيرىعىندا ايتىلعان.
شەكتەۋلەر تەك ەكىنشى دۇنيەجۇزىلىك سوعىس ارداگەرلەرىنە، ديپلوماتتارعا جانە باسقا دا ۇكىمەت وكىلدەرىنە قويىلدى. سونداي-اق، تىيىمدار ەسكەرتكىشتەر مەن ىرگەلەس اۋماقتاردىڭ سىرتىنداعى ميتينگىلەرگە دە قولدانىلمايدى. مۇندا جينالىستار تۋرالى زاڭنىڭ ادەتتەگى ەرەجەلەرى قولدانىلادى.
ال رەسەي ەلشىلىگى بولسا جالاۋلارعا سالىنعان تىيىمدى الىپ تاستاۋعا شاقىردى.
«ءبىز بۇل تىيىمدى سوعىستان كەيىنگى كەزەڭدەگى رەسەي مەن گەرمانيا حالىقتارى اراسىنداعى تاريحي كەلىسىم رۋحىنا قايشى كەلەتىن كەمسىتۋشىلىك دەپ سانايمىز»، - دەلىنگەن ەلشىلىكتىڭ مالىمدەمەسىندە.
