استانادا ۆيدەوسى الەۋمەتتىك جەلىدە تاراپ كەتكەن ۇلتتىق ۇلاننىڭ بۇرىنعى ساربازىن سوققىعا جىققان ەكى كۇدىكتى ۇستالدى، - دەپ حابارلايدى “ادىرنا” ۇلتتىق پورتالى قر ءىىم ءباسپاسوز قىزمەتىنە سىلتەمە جاساپ.
«قىلمىستىق ىسكە قاتىستى جەدەل-ىزدەستىرۋ شارالارىنىڭ ارقاسىندا ۇلتتىق ۇلاننىڭ بۇرىنعى اسكەري قىزمەتشىسىن ۇرىپ-سوعۋعا قاتىسى بار بارلىق كۇدىكتىلەردىڭ ورنالاسقان جەرى انىقتالدى. استانادا 24 ساعات ىشىندە ەكى كۇدىكتى – دەنەگە تىكەلەي زاقىم كەلتىرگەن جابىرلەنۋشىنىڭ بۇرىنعى ارىپتەستەرى تۇرعىلىقتى جەرى بويىنشا جەدەل تۇردە ۇستالدى. ەكەۋى دە ۋاقىتشا ۇستاۋ يزولياتورىنا قامالدى»، - دەلىنگەن ۆەدومستۆو حابارلاماسىندا.
تەرگەۋ اياسىندا بارلىق قاتىسى بار ادامداردان جاۋاپ الىندى. ولاردىڭ ارەكەتىنە، سونىڭ ىشىندە ۆيدەونى تۇسىرگەن ادامعا دا قۇقىقتىق باعا بەرىلەدى. تەرگەۋ شارالارى جالعاسۋدا، دەپ حابارلادى ءباسپاسوز قىزمەتى.
بۇعان دەيىن الەۋمەتتىك جەلىدە كامۋفلياج كيگەن جىگىتتى پويىز ۆاگوندارىنىڭ وتكەلىندە بەلگىسىز بىرەۋلەردىڭ ۇرىپ جاتقان ۆيدەوسى تاراعان بولاتىن. ىشكى ىستەر مينيسترلىگىنە قاراستى ۇلتتىق ۇلان كامەراعا ءتۇسىپ قالعان ارنايى فورمانىڭ وسى باسقارماعا تيەسىلى ەكەنىن راستاعان ەدى.
ىشكى ىستەر مينيسترلىگى وقيعا 2023 جىلدىڭ كۇزىندە، بورىشىن وتەپ، زاپاسقا جىبەرىلگەن ساربازداردىڭ ۇيلەرىنە قايتىپ بارا جاتقان كەزدە بولعانىن حابارلادى.
قازاقستان پرەزيدەنتى قاسىم-جومارت توقاەۆ ىشكى ىستەر ءمينيسترى ەرجان سادەنوۆكە شابۋىل جاساعانداردى جاۋاپقا تارتۋ ءۇشىن شۇعىل شارالار قابىلداۋدى تاپسىرعان بولاتىن.
