قازاقستان رەسپۋبليكاسىنىڭ پرەزيدەنتى ق. ك. توقاەۆ ەكونوميكانى دامىتۋ ءۇشىن تسيفرلى تەحنولوگيالاردى كۇندەلىكتى ومىرگە بەلسەندى ەندىرۋدىڭ ماڭىزدى ەكەندىگىن اتاپ ءوتىپ، ءبىلىم سالاسىندا دا ەلەكتروندى وقۋلىقتارعا كوشۋ تۋرالى تاپسىرما بەرگەن بولاتىن. وسىعان وراي «اتامۇرا» باسپاسى ءداستۇرلى قاعاز وقۋلىقتارىنىڭ ەلەكتروندى نۇسقاسىن دايىنداپ، oqulyqtar.kz ءبىلىم بەرۋ پلاتفورماسىندا ۇسىنىپ وتىر.
ەلەكتروندى وقۋلىقتاردىڭ باستى ماقساتى − مەكتەپ وقۋشىلارىنىڭ سومكەسىن جەڭىلدەتۋ، ءبىلىم بەرۋ مۇمكىندىكتەرىن كەڭەيتۋ جانە ونىڭ ساپاسىن ارتتىرۋ.
Oqulyqtar.kz ءبىلىم بەرۋ پلاتفورماسى قازاقستاندىق سەرۆەرلەردە ورنالاسقان. قازاقستان رەسپۋبليكاسىنىڭ اقپاراتتىق قاۋىپسىزدىك تالاپتارىنا سايكەس كەلەدى. وسى پلاتفورماداعى ەلەكتروندى وقۋلىقتار مەملەكەتتىك ستاندارتقا جانە وقۋ باعدارلامالارىنا ساي جاسالعان. ەلەكتروندى وقۋلىقتاردى پايدالانۋ وقۋ پروتسەسىنىڭ تيىمدىلىگىن ارتتىرىپ، وقۋشىلاردىڭ ۇلگەرىمىن جاقسارتادى، ينتەراكتيۆتى تاپسىرمالارى وقۋعا دەگەن قىزىعۋشىلىقتى تۋدىرىپ، ءبىلىم الۋ ناتيجەسىن تەز باعالاۋعا كومەكتەسەدى.
ەلەكتروندى وقۋلىقتاردىڭ ەرەكشەلىكتەرى:
- مۋلتيمەديالىق رەسۋرستار، ياعني اۋديوجازبا جانە بەينەجازبا، ينتەربەلسەندى تاپسىرمالار، ءتۇرلى يلليۋستراتسيالار، بەينەماتەريالداردى بىرنەشە رەت قايتالاپ كورە الۋ مۇمكىندىگى كۇردەلى تاقىرىپتاردى تەز قابىلداپ، جەڭىل تۇسىنۋگە كومەكتەسەدى.
- جەكە نەمەسە بىرلەسكەن توپتىق جۇمىستار وقۋ بارىسىن تۇرلەندىرىپ، قىزىقتى ۇيىمداستىرۋعا مۇمكىندىك بەرەدى.
- ينتەراكتيۆتى گلوسساري، ءتۇرلى پاندەر بويىنشا تاقىرىپتاردى ىزدەۋ جانە تالداۋ − جاساندى ينتەللەكت پەن پانارالىق بايلانىستار نەگىزىندە جۇزەگە اسىرىلادى.
- ەلەكتروندى وقۋلىقتار كەز كەلگەن ساتتە، كەز كەلگەن ورىندا، كەز كەلگەن قۇرىلعىدا قولجەتىمدى.
مىسالى، oqulyqtar.kz ءبىلىم بەرۋ پلاتفورماسىنداعى 1-سىنىپقا ارنالعان «الىپپە» ەلەكتروندى وقۋلىعىندا قازاق ءالىپبيىن ۇيرەتۋ ءۇشىن ۇلتتىق كيىم كيگەن بالالاردىڭ قاتىسۋىمەن انيماتسيالانعان بەينەروليكتەر بەرىلگەن. اۋديوجازبالار ارقىلى قازاق ماقال-ماتەلدەرى مەن جاڭىلتپاشتارىن تىڭداۋعا، ينتەراكتيۆتى تاپسىرمالاردى ورىنداۋعا بولادى.
3-سىنىپقا ارنالعان «تسيفرلىق ساۋاتتىلىق» وقۋ-ادىستەمەلىك كەشەنى بلۋم تاكسونومياسى، شتەرنبەرگتىڭ مودەلى نەگىزىندە، سونىمەن قاتار سپيرالدىق ءپرينتسيپتى ەسكەرە وتىرىپ ازىرلەندى.
جوبالىق تەحنولوگيانى قولدانۋ وقۋشىلارعا تەك تەوريالىق ءبىلىم الىپ قانا قويماي، ونى پراكتيكادا قولدانۋعا جانە جەكە، ۇجىمدىق وقىتۋدا تاجىريبە جيناقتاۋعا مۇمكىندىك بەرەدى. بۇل وقۋ تيىمدىلىگىن ارتتىرادى جانە ونى قىزىقتى ەتەدى. ەلەكتروندى وقۋلىقتا كەيبىر ماتەريالداردىڭ ويىن تۇرىندە بەرىلۋى جاڭا ساباقتى مەڭگەرۋگە، تۇسىنۋگە، تەكسەرۋگە جانە پانگە دەگەن قىزىعۋشىلىعىن ارتتىرۋعا ىقپال ەتەدى.
بۇعان دەيىن مەكتەپتەردە 3-سىنىپقا ارنالعان «كوركەم ەڭبەك» بولىپ وقىتىلىپ كەلگەن ءپان بيىلدان باستاپ «ەڭبەككە باۋلۋ» جانە «بەينەلەۋ ونەرى» دەپ ەكى پانگە ءبولىندى. اتالعان وقۋلىقتار وقۋشىنىڭ جاس ەرەكشەلىگىنە سايكەس الۋان ءتۇرلى تاقىرىپتان، تۇسىنۋگە جەڭىل ماتىندەر مەن اسەم بەزەندىرىلگەن يلليۋستراتسيالاردان تۇرادى.
ساباق اياسىن كەڭەيتۋگە مۇمكىندىك بەرەتىن، ءتۇرلى بۇيىمدار جاساۋدىڭ شىعارماشىلىق بارىسىن كورسەتەتىن «ەڭبەككە باۋلۋ» وقۋلىعىنىڭ ەلەكتروندى نۇسقاسىندا بەينەروليكتەر كورسەتۋ، اۋديو جازبالاردى تىڭداتۋ، ءتۇرلى ينتەراكتيۆتى تاپسىرمالاردى ورىنداتۋ وقىتۋدى جان-جاقتى قىزىقتى وتكىزۋگە سەپتىگىن تيگىزەدى.
«بەينەلەۋ ونەرى» وقۋلىعىنىڭ ەلەكتروندى نۇسقاسىندا وقۋشىلاردىڭ قىزىعۋشىلىعىن وياتىپ، تانىمىن دامىتاتىن ينتەراكتيۆتى تاپسىرمالار، اۋديو-بەينەجازبالار، سۋرەت سالۋ جولدارى، ماڭىزدى اقپاراتتار بەرىلگەن. ەلەكتروندى قۇرال ارقىلى سۇراقتاردىڭ جاۋابى مەن سۋرەتتەردى سايكەستەندىرەدى، سۋرەتتەرگە ءپىشىم تاڭدايدى، زاتتاردان ۇيلەسىمدى ناتيۋرمورت قۇراستىرادى، ونلاين باعدارلاما ارقىلى سۋرەت سالا الادى. دەمەك، وقۋشىلار ساباق ماتەريالىن مەڭگەرۋمەن قاتار، زاماناۋي اقپاراتتىق قۇرالداردى قولدانۋعا ۇيرەنەدى.
وقۋلىقتارداعى ينتەربەلسەندى تاپسىرمالار مەن تاجىريبەلەر وقۋشىلاردىڭ بىلىمدەرىن ءىس جۇزىندە قولدانۋعا، بەلسەندى بولۋعا، ويلاۋ قابىلەتىن دامىتۋعا، شىعارماشىلىق جۇمىستارعا بەيىمدەلۋىنە ىقپال ەتەدى.
ەلەكتروندى وقۋلىقتاردىڭ وقۋ-ادىستەمەلىك كەشەنىنە جازىلۋعا جانە ولاردى وقۋ پروتسەسىندە كەڭىنەن قولدانۋعا بولادى. ول ءۇشىن:
1) oqulyqtar.kz پلاتفورماسىندا جەكە پايدالانۋشى رەتىندە «اتامۇرا» پاكەتىن تاڭداۋ كەرەك;
2) قازاقستان رەسپۋبليكاسىنىڭ مەملەكەتتىك ساتىپ الۋ سايتىندا كورپوراتيۆتى پايدالانۋشى رەتىندە تىركەلۋ قاجەت.
