اەس سالۋدى قولداۋ جونىندەگى حالىق شتابىنىڭ جۇمىسى بۇگىن پاۆلودار وبلىسىندا جالعاستى. سەنات توراعاسى ماۋلەن اشىمباەۆ باستاعان دەپۋتاتتار، ساراپشىلار جانە قوعام قايراتكەرلەرى اقسۋ، پاۆلودار قالالارىندا بولىپ، ەنەرگەتيكالىق كورپوراتسيانىڭ ۇجىمىمەن، سونداي-اق، مەتاللۋرگيا سالاسىندا ەڭبەك ەتەتىن ماماندارمەن كەزدەستى. شتاب مۇشەلەرى ساراپشىلار قاۋىمداستىعىمەن جانە بەلسەندى جاستارمەن دە جۇزدەستى. ءىس-شارالار بارىسىندا اەس سالۋ ماسەلەسىنە قاتىستى رەفەرەندۋمنىڭ ماڭىزى مەن ءمانى تالقىلاندى.
ەۋرازيالىق ەنەرگەتيكالىق كورپوراتسياسىنىڭ جانە قازاقستان ءاليۋمينيى كومپانياسىنىڭ ۇجىمدارىمەن كەزدەسۋلەردە شتاب مۇشەلەرى ەنەرگەتيكا سالاسىنداعى ماڭىزدى پروبلەمالارعا، ناقتى ايتقاندا، ونىڭ تاپشىلىعىنا جانە ەلەكتر ستانسالارىنىڭ توزۋى مەن يمپورتقا تاۋەلدىلىك ماسەلەلەرىنە جان-جاقتى توقتالدى.
سەنات توراعاسى اتاپ وتكەندەي، قازاقستان جان باسىنا شاققانداعى كومىرقىشقىل گازىنىڭ شىعارىندىلارى بويىنشا الەمدە الدىڭعى ورىنداردىڭ ءبىرىن الادى. وسى ورايدا ەلىمىزدە كومىرتەگى قالدىعىن ازايتۋ ءۇشىن وندىرىسكە يننوۆاتسيانى كەڭىنەن ەنگىزۋدىڭ ماڭىزى زور. بۇل رەتتە ەلدەگى ەنەرگيا تاپشىلىعىن اۋاعا كومىرقىشقىل گازىن بارىنشا از شىعاراتىن ەنەرگيا كوزدەرى ارقىلى شەشۋ ماسەلەسى وتە وزەكتى.
«پرەزيدەنتىمىز قاسىم-جومارت كەمەلۇلى توقاەۆتىڭ ماقۇلداۋىمەن 6 قازاندا ەلىمىزدە اەس سالۋ ماسەلەسىنە قاتىستى رەسپۋبليكالىق رەفەرەندۋم وتەدى. رەفەرەندۋمنىڭ ماڭىزى مەن مىندەتتەرىن جان-جاقتى ءتۇسىندىرۋ ءۇشىن حالىق شتابى قۇرىلدى. ونىڭ قۇرامىندا دەپۋتاتتار، پارتيالار مەن ءتۇرلى ۇيىمدار جانە ەل ەرتەڭىنە بەي-جاي قارامايتىن بەلسەندى ازاماتتار بار. قازىرگى تاڭدا ەلىمىزدە جۇمىس ىستەپ تۇرعان كومىر ستانسالارىنىڭ توزۋ دەڭگەيى شامامەن 70 پايىزعا جەتتى. ارينە، ەلىمىز تابيعي رەسۋرستارعا باي. دەگەنمەن، ولاردىڭ كوپشىلىگى قايتا قالپىنا كەلمەيتىن رەسۋرستار ەكەنىن ەسكەرۋىمىز كەرەك. ياعني ولاردىڭ قورى شەكسىز ەمەس. سوندىقتان ەلدىڭ جارقىن بولاشاعىن قامتاماسىز ەتەتىن، ەرتەڭگى كۇنگە دەگەن سەنىمدى ارتتىراتىن تۇراقتى جانە قاۋىپسىز ەنەرگيا كوزى قاجەت. بۇل رەتتە ءدال وسى اتوم ەلەكتر ستانساسى ۇزاق جىلدار بويى ەنەرگيامەن قامتاماسىز ەتەتىن الەۋەتكە يە», – دەدى ماۋلەن اشىمباەۆ.
سونىمەن قاتار شتاب مۇشەلەرى جاستار باستامالارىن دامىتۋ ورتالىعىندا ءوڭىردىڭ بەلسەندى جاستارىمەن كەزدەستى. پالاتا سپيكەرى ەل بولاشاعىنا ىقپال ەتەتىن ماسەلە كۇن تارتىبىنە شىعارىلعان رەفەرەندۋمعا جاستاردىڭ بەلسەندى قاتىسۋى ماڭىزدى ءرول اتقاراتىنىن ايتتى. شتاب مۇشەلەرى وڭىردەگى ساراپشىلار قاۋىمداستىعىمەن كەزدەسۋدە جالپىۇلتتىق رەفەرەندۋم ەلدىڭ دامۋى جولىندا شەشۋشى مانگە يە ەكەنىنە توقتالىپ ءوتتى. سۇحبات كەزىندە اەس-ءتىڭ ەلگە بەرەر يگىلىگىن حالىققا ساپالى ءارى جان-جاقتى ءتۇسىندىرۋدىڭ ماڭىزدى ەكەنى دە ايتىلدى.
