سەنات توراعاسى ماۋلەن اشىمباەۆ ەلىمىزدەگى مەملەكەتتىك قورلار قاراجاتىنىڭ جۇمسالۋىن باقىلاۋ ماسەلەسىن كوتەرىپ، ماسەلەلەردى ايتتى، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
«بۇگىنگى تاڭدا مەديتسينالىق ساقتاندىرۋ، الەۋمەتتىك ساقتاندىرۋ قورى، بىرىڭعاي جيناقتىق زەينەتاقى قورى جانە باسقالارى بار. بۇل قورلارداعى اكتيۆتەر ەل بيۋدجەتىنىڭ بارلىق شىعىسىنان اسىپ تۇسەدى. بۇگىن بىزدە بيۋدجەتتىڭ شىعىس بولىگى 24 تريلليون تەڭگە بولسا، بۇل قورلاردىڭ اكتيۆتەرى 25 تريلليون تەڭگەدەن اسادى. ياعني، قورلاردا ۇلكەن قاراجات جيناقتالعان. ەندى بۇل قۇرالداردى باقىلاۋ جانە ولاردى پايدالانۋ ماسەلەسى تۋىندايدى»، - دەدى م. اشىمباەۆ سەنات وتىرىسىندا.
اشىمباەۆ رەسپۋبليكالىق بيۋدجەتتىڭ اتقارىلۋى بويىنشا ەسەپ بەرۋدە دە قايىرىمدىلىق قورلار ءبىر عانا پاراقپەن كەلەتىنىن سىنعا الدى.
«وندا شىنىمەن نە بولىپ جاتقانىن ءتۇسىنۋ وتە قيىن. بۇل جاعدايدا پارلامەنت بۇل شىعىنداردى باقىلامايدى، ولارعا قارامايدى. ەڭبەك مينيسترلىگىنىڭ بۇل قاراجاتتىڭ قالاي جۇمسالىپ جاتقانىن قاداعالاۋعا قانشالىقتى مۇمكىندىگى بار ەكەنىن بىلمەيمىن. جالپى، بۇل وتە ماڭىزدى ماسەلە. وندا ۇلكەن قاراجات جاتىر. ءبىز قازىر رەسپۋبليكالىق بيۋدجەتتى قاراپ، جىلۋ ەنەرگەتيكاسى جانە باسقا دا باعىتتارعا قاراجات تابا الماي وتىرمىز. ال وندا ۇلكەن قاراجات جيناقتالعان، ەندىگى ماسەلە – ولاردىڭ باقىلاۋدا بولۋى جانە جالپىۇلتتىق ماقساتتاردا پايدالانۋ»، - دەدى م. اشىمباەۆ.
ماۋلەن اشىمباەۆ وسى باعىتتا ۇكىمەت باقىلاۋى ءۇشىن قانداي دا ءبىر شارالاردى قابىلداۋ قاجەتتىگىن جەتكىزدى.
«ەگەر بىزدە ەكونوميكانىڭ ناقتى سەكتورىن دامىتۋ مىندەتى بولسا، وندا بۇل قاراجاتتىڭ بولىگى ءتۇرلى قارجى قۇرالدارى ارقىلى ەكونوميكانىڭ ناقتى سەكتورىن دامىتۋ ءۇشىن جۇمىس ىستەۋى كەرەك دەگەندى بىلدىرەدى. مۇنى قالاي جاساۋ كەرەكتىگى – ۇكىمەتتىڭ قارجىلىق جانە ەكونوميكالىق بلوگىنىڭ، الەۋمەتتىك قورعاۋ مينيسترلىگىنىڭ مىندەتى. بيىل رەسپۋبليكالىق بيۋدجەتتىڭ اتقارىلۋىن قاراستىرۋ كەزىندە بۇل ماسەلەگە قايتا ورالۋ قاجەت»، - دەدى ماۋلەن اشىمباەۆ.
