قازتالوۆ اۋدانىنىڭ ورتالىعىندا تۇرعىن ءۇي كەزەگىندەگى ازاماتتارعا باسپانا كىلتى تابىستالدى، دەپ حابارلايدى "ادىرنا" ۇلتتىق پورتالى.
مەملەكەت باسشىسى قاسىم-جومارت توقاەۆ ءۇي كەزەگىندە تۇرعان الەۋمەتتىك وسال توپتاعى ازاماتتاردىڭ باسپانا ماسەلەسىن شەشۋ قاجەتتىگىن ايتا كەلە: «الەۋمەتتىك وسال توپتاعى ازاماتتارعا قولداۋ كورسەتۋ – ءبىزدىڭ باستى مىندەتىمىز. ءۇي كەزەگىندە تۇرعان ازاماتتاردىڭ باسپانا ماسەلەسىن شەشۋ ءۇشىن مەملەكەتتىك قولداۋدى كۇشەيتىپ، تۇرعىن ءۇي قۇرىلىسى مەن ونىڭ قولجەتىمدىلىگىن ارتتىرۋ قاجەت. اسىرەسە كوپبالالى وتباسىلارعا، مۇگەدەكتىگى بار جاندارعا جانە حالىقتىڭ الەۋمەتتىك وسال توپتارىنا ەرەكشە نازار اۋدارىپ، ولاردىڭ باسپاناعا قول جەتكىزۋىنە بارىنشا جاعداي جاساۋىمىز كەرەك» – دەپ ۇكىمەتكە تاپسىرما بەرگەن بولاتىن.
پرەزيدەنتتىڭ تاپسىرماسىنا سايكەس بيىلعى جىلى كازتالوۆ اۋدانى بويىنشا 28 ەلدى-مەكەندە ءۇي كەزەگىندە تۇرعان الەۋمەتتىك وسال توپتاعى وتباسىلارعا ارناپ قوس پاتەردەن 116 ۇيگە قارجى ءبولىنىپ، سالىنىپ، قولدانىسقا بەرىلۋدە.
وبلىس اكىمى باسپاناعا يە بولعان ازاماتتاردى قۇتتىقتاپ، تۇرعىن ءۇي كىلتىن سالتاناتتى تۇردە تابىس ەتتى. باسپانا يەلەرى مەملەكەتتىك باعدارلامانىڭ اۋداندا جۇزەگە اسۋىنا ىقپال ەتكەن وبلىس باسشىلىعىنا ريزاشىلىقتارىن ءبىلدىردى.
— بۇگىن پرەزيدەنتىمىز قاسىم-جومارت كەمەلۇلىنىڭ باستاماسىمەن اۋىل-ايماقتاردى دامىتۋ بويىنشا بەرىلگەن تاپسىرماسىنىڭ ارقاسىندا باسپانالى بولىپ جاتىرمىز. وسى باعدارلامانىڭ جۇزەگە اسىرىلۋىنا ات سالىسقان بارشا ازاماتتارعا جانە جاڭا باسپانا سالىپ بەرگەن مەردىگەرگە ريزاشىلىعىمدى بىلدىرەمىن. باسپانا يەلەرىن بۇگىنگى قۋانىشتارىمەن شىڭ جۇرەكتەن قۇتتىقتايمىن. الداعى وتەتىن رەفەرەندۋمدا ەلىمىزدىڭ ەرتەڭى ءۇشىن وتباسىمىزبەن ءوز تاڭداۋىمىزدى جاسايتىن بولامىز. مەملەكەتىمىزدىڭ قولداۋىنىڭ ارقاسىندا باسپانالى بولاتىن وتباسىلارىمىز كوپ بولسىن.، — دەدى كازتالوۆ اۋىلىنىڭ تۇرعىنى ارايلىم سانسىزباەۆا.
كاسىبي مەدياتور، ەڭبەك ارداگەرى مارات توياسوۆ تا باعدارلامانىڭ يگىلىگى مول ەكەنىن جەتكىزدى.
— سوڭعى ۋاقىتتا اۋدانىمىزدا تۇرعىن ۇيلەردىڭ سالىنۋى قۋانتارلىق ءجايت. الدىمەن حالىق باسپانالى بولىپ قالماق. سودان سوڭ جاڭا ۇيلەر اۋىلدىڭ اجارىن كەلتىرەدى. بيىل اۋدانىمىزدا تۇرعىن ءۇي كەزەگىندەگى وتباسىلاردى باسپانامەن قامتاماسىز ەتۋ ماقساتىندا 150-گە جۋىق تۇرعىن ۇيلەر سالىنىپ جاتىرعانى جونىندە اقپاراتتى الەۋمەتتىك جەلىلەر، گازەت، تەلەديدار ارقىلى ەستىپ، ءبىلىپ وتىرمىز. اۋدان اكىمدەرىنىڭ حالىقپەن كەزدەسۋ جيىندارىندا كوتەرىلىپ جۇرگەن ماسەلەلەردىڭ ءبىرى وسى – باسپانا ماسەلەسى. بۇل دا ءوز كەزەگىمەن شەشىمىن تاۋىپ، حالىقتىڭ قۋانىشى ەسەلەنىپ وتىر. ەلىمىزدى جانە سونىڭ ىشىندە وڭىرىمىزدە ورىن العان تابيعي اپات سۋ تاسقىنى ورىن العان بولاتىن. پرەزيدەنتىمىزدىڭ تىكەلەي تاپسىرماسىمەن وبلىسىمىزدىڭ بىرنەشە اۋداندارىندا جانە ورال قالاسىندا ساناۋلى كۇندەردىڭ ىشىندە جاڭا باسپانالار بوي كوتەرگەنىنە بارشامىز كۋامىز. وسى جۇمىستاردىڭ باس قاسىندا جۇرگەن سىزگە دە شىناي ريزاشىلىعىمىزدى بىلدىرەمىز. پرەزيدەنتىمىزدىڭ باستاماسىمەن 6-شى قازاڭدا وتكىزىلەتىن رەفەرەندۋمعا جەرلەستەرىمىزبەن بەلسەنە قاتىسىپ، ەلىمىزدە اتوم ەلەكتر ستانتسياسىنىڭ سالىنۋى ءۇشىن تاڭداۋ جاسايمىز. باسپاناعا يە بولىپ وتىرعان وتباسىلاردى شىن جۇرەكتەن قۇتتىقتايمىن! شاڭىراقتارىڭىز شاتتىققا تولىپ، بەرەكەلى باسپانادا باقىتتى عۇمىر كەشىڭىزدەر! ەلىمىز امان، جۇرتىمىز تىنىش بولىپ، اۋىلىمىز اجارلانا بەرسىن!، — دەدى ول.
اۋدان ورتالىعىنداعى تۇرعىن ءۇيدى نازاربەك قۋانوۆ سالسا، قونىس ەلدى مەكەنىندەگى تۇرعىن ءۇيدىڭ قۇرىلىسىن رينات عۇبايدۋللين جۇرگىزدى.
