Qaztalov aýdanynyń ortalyǵynda turǵyn úı kezegindegi azamattarǵa baspana kilti tabystaldy, dep habarlaıdy "Adyrna" ulttyq portaly.
Memleket basshysy Qasym-Jomart Toqaev úı kezeginde turǵan áleýmettik osal toptaǵy azamattardyń baspana máselesin sheshý qajettigin aıta kele: «Áleýmettik osal toptaǵy azamattarǵa qoldaý kórsetý – bizdiń basty mindetimiz. Úı kezeginde turǵan azamattardyń baspana máselesin sheshý úshin memlekettik qoldaýdy kúsheıtip, turǵyn úı qurylysy men onyń qoljetimdiligin arttyrý qajet. Ásirese kópbalaly otbasylarǵa, múgedektigi bar jandarǵa jáne halyqtyń áleýmettik osal toptaryna erekshe nazar aýdaryp, olardyń baspanaǵa qol jetkizýine barynsha jaǵdaı jasaýymyz kerek» – dep Úkimetke tapsyrma bergen bolatyn.
Prezıdenttiń tapsyrmasyna sáıkes bıylǵy jyly Kaztalov aýdany boıynsha 28 eldi-mekende úı kezeginde turǵan áleýmettik osal toptaǵy otbasylarǵa arnap qos páterden 116 úıge qarjy bólinip, salynyp, qoldanysqa berilýde.
Oblys ákimi baspanaǵa ıe bolǵan azamattardy quttyqtap, turǵyn úı kiltin saltanatty túrde tabys etti. Baspana ıeleri memlekettik baǵdarlamanyń aýdanda júzege asýyna yqpal etken oblys basshylyǵyna rızashylyqtaryn bildirdi.
— Búgin Prezıdentimiz Qasym-Jomart Kemelulynyń bastamasymen aýyl-aımaqtardy damytý boıynsha berilgen tapsyrmasynyń arqasynda baspanaly bolyp jatyrmyz. Osy baǵdarlamanyń júzege asyrylýyna at salysqan barsha azamattarǵa jáne jańa baspana salyp bergen merdigerge rızashylyǵymdy bildiremin. Baspana ıelerin búgingi qýanyshtarymen shyń júrekten quttyqtaımyn. Aldaǵy ótetin referendýmda elimizdiń erteńi úshin otbasymyzben óz tańdaýymyzdy jasaıtyn bolamyz. Memleketimizdiń qoldaýynyń arqasynda baspanaly bolatyn otbasylarymyz kóp bolsyn., — dedi Kaztalov aýylynyń turǵyny Araılym Sansyzbaeva.
Kásibı medıator, eńbek ardageri Marat Toıasov ta baǵdarlamanyń ıgiligi mol ekenin jetkizdi.
— Sońǵy ýaqytta aýdanymyzda turǵyn úılerdiń salynýy qýantarlyq jáıt. Aldymen halyq baspanaly bolyp qalmaq. Sodan soń jańa úıler aýyldyń ajaryn keltiredi. Bıyl aýdanymyzda turǵyn úı kezegindegi otbasylardy baspanamen qamtamasyz etý maqsatynda 150-ge jýyq turǵyn úıler salynyp jatyrǵany jóninde aqparatty áleýmettik jeliler, gazet, teledıdar arqyly estip, bilip otyrmyz. Aýdan ákimderiniń halyqpen kezdesý jıyndarynda kóterilip júrgen máselelerdiń biri osy – baspana máselesi. Bul da óz kezegimen sheshimin taýyp, halyqtyń qýanyshy eselenip otyr. Elimizdi jáne sonyń ishinde óńirimizde oryn alǵan tabıǵı apat sý tasqyny oryn alǵan bolatyn. Prezıdentimizdiń tikeleı tapsyrmasymen oblysymyzdyń birneshe aýdandarynda jáne Oral qalasynda sanaýly kúnderdiń ishinde jańa baspanalar boı kótergenine barshamyz kýámiz. Osy jumystardyń bas qasynda júrgen Sizge de shynaı rızashylyǵymyzdy bildiremiz. Prezıdentimizdiń bastamasymen 6-shy qazańda ótkiziletin referendýmǵa jerlesterimizben belsene qatysyp, elimizde atom elektr stanııasynyń salynýy úshin tańdaý jasaımyz. Baspanaǵa ıe bolyp otyrǵan otbasylardy shyn júrekten quttyqtaımyn! Shańyraqtaryńyz shattyqqa tolyp, berekeli baspanada baqytty ǵumyr keshińizder! Elimiz aman, jurtymyz tynysh bolyp, aýylymyz ajarlana bersin!, — dedi ol.
Aýdan ortalyǵyndaǵy turǵyn úıdi Nazarbek Qýanov salsa, Qonys eldi mekenindegi turǵyn úıdiń qurylysyn Rınat Ǵubaıdýllın júrgizdi.
