تۇركىستان ەرەكشە مارتەبەگە يە بولادى. پارلامەنت ماجىلىسىندە "تۇركىستان قالاسىنىڭ ەرەكشە مارتەبەسى تۋرالى" زاڭ جوباسى ۇسىنىلدى. بۇل تۋرالى ۇلتتىق ەكونوميكا مينيسترلىگى مالىمدەدى، دەپ حابارلايدى “ادىرنا” ۇلتتىق پورتالى.
"زاڭ جوباسىن ازىرلەۋگە تۇركىستان قالاسىن تۇركى مەملەكەتتەرى ۇيىمىمەن تۇركى الەمىنىڭ رۋحاني استاناسى رەتىندە تانۋى، قالانىڭ تاريحي كەلبەتى مەن تاريحي-مادەني مۇرا وبەكتىلەرىن ساقتاۋ قاجەتتىلىگى نەگىز بولدى", - دەپ جازىلعان حابارلامادا.
زاڭ جوباسىنىڭ نەگىزگى نوۆەللالارى:
تۇركىستان قالاسىنىڭ ارحەولوگيا ەسكەرتكىشتەرىنىڭ رەزەرۆاتىن قۇرۋ،
قوجا احمەت ياساۋي كەسەنەسىنىڭ اينالاسىنداعى قۇرىلىستى شەكتەۋ،
كاسىپكەرلەر مەن قولونەرشىلەردى قولداۋ سىندى وزگە دە شارالار.
"قالاعا ەرەكشە مارتەبە بەرۋ تۇركىستاننىڭ تۇركى الەمىنىڭ رۋحاني استاناسى، تۋريستەر مەن قاجىلاردى تارتۋ ورتالىعى رەتىندەگى الەۋەتىن جان-جاقتى اشۋعا مۇمكىندىك بەرەدى، ناتيجەسىندە بۇكىل ءوڭىردىڭ الەۋمەتتىك-ەكونوميكالىق دامۋىنا ءارى حالىقتىڭ ءومىر ءسۇرۋ دەڭگەيىن ساپالى جاقسارتۋعا مۋلتيپليكاتيۆتىك اسەر ەتەدى", - دەپ اتاپ ءوتتى ۇلتتىق ەكونوميكا ۆيتسە-ءمينيسترى باۋىرجان وماربەكوۆ.
تۇركىستان قالاسىنىڭ ءماسليحاتى قالا قۇرىلىسى رەگلامەنتىن، قالانىڭ ديزاين-كودىن، ساۋلەت كەلبەتىن قالىپتاستىرۋ جانە قالا قۇرىلىسىن جوسپارلاۋ قاعيدالارىن، تۇركىستان اۋماعىندا رامىزدەردى قولدانۋ ءتارتىبىن جانە ت.ب. بەكىتەدى.
قالا اكىمدىگىنە 3 باعىت بويىنشا 27 قۇزىرەت بەرىلەدى. العاشقىسى قالانىڭ مادەني يگىلىگى مەن رۋحاني دامۋىن ساقتاۋ ماسەلەلەرىن رەتتەۋگە، تاريحي-مادەني مۇرا وبەكتىلەرىنىڭ ساقتالۋىن قامتاماسىز ەتۋگە باعىتتالعان.
ەكىنشى باعىت – كەسەنەنىڭ اينالاسىنداعى قۇرىلىس ستاندارتتارىن جانە قالا اۋماعىندا بىرىڭعاي قۇرىلىس ءستيلىن قولدانۋ.
ءۇشىنشى باعىت – تۋريستىك قىزمەتكە جاردەمدەسۋ ماسەلەلەرىن رەتتەۋگە جانە ونى دامىتۋ ءۇشىن قولايلى جاعدايلار جاساۋعا، تۋريستىك تارتىمدىلىق ورىندارىنىڭ قولجەتىمدىلىگىن قامتاماسىز ەتۋ ءۇشىن كولىك جانە ينجەنەرلىك ينفراقۇرىلىمدى بەيىمدەۋگە باعىتتالعان.
بۇدان بولەك، ىلەسپە زاڭ جوباسى ازىرلەندى، ونىڭ شەڭبەرىندە جەر كودەكسىنە، "قر ساۋلەت، قالا قۇرىلىسى جانە قۇرىلىس قىزمەتى تۋرالى", "تاريحي-مادەني مۇرا وبەكتىلەرىن قورعاۋ جانە پايدالانۋ تۋرالى", "قر تۋريستىك قىزمەت تۋرالى" زاڭدارعا وزگەرتۋلەر مەن تولىقتىرۋلار ەنگىزۋ كوزدەلگەن.
