وزبەكستاندا مەملەكەتتىك قىزمەتتە ءجۇرىپ، كاسىپكەرلىك سۋبەكتىلەرىنە يەلىك ەتكەن 3 مينيسترلىكتىڭ 107 مامانى انىقتالدى. بۇل تۋرالى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار جاريالادى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، كولىك مينيسترلىگى، مەكتەپكە دەيىنگى جانە مەكتەپتەگى ءبىلىم مينيسترلىگى مەن مادەنيەت مينيسترلىگىنىڭ باسشىلىق لاۋازىمداعى 107 قىزمەتكەرى 116 كاسىپكەرلىك سۋبەكتىسىنىڭ قۇرىلتايشىسى بولعانى انىقتالدى.
وزبەكستاننىڭ سىبايلاس جەمقورلىققا قارسى ءىس-قيمىل اگەنتتىگىنىڭ مالىمەتىنشە, كولىك مينيسترلىگىندە 50 قىزمەتكەر 55 كومپانيانىڭ قۇرىلتايشىسى بولسا، مەكتەپكە دەيىنگى جانە مەكتەپتەگى ءبىلىم مينيسترلىگىندە 37 مامان 39 بيزنەسكە يەلىك ەتكەن.
بۇعان قوسا، مادەنيەت مينيسترلىگىنىڭ 20 قىزمەتكەرى 22 كومپانيانىڭ باسشىسى ەكەنى انىقتالدى.
اگەنتتىك اتالعان مينيسترلىكتەرگە ءتيىستى ۇسىنىس جولداپ، مەملەكەتتىك قىزمەتشىلەرگە ەسكەرتۋ جاساعان. قازىرگى ۋاقىتتا زاڭ بۇزۋشىلىقتاردى جويۋ بويىنشا جۇمىس جۇرگىزىلىپ جاتىر.
ايتا كەتەيىك، بۇعان دەيىن وزبەكستاندا ءوز قىزمەتىن دۇرىس اتقارماعان 18 يمام قىزمەتىنەن شىعارىلعانىن حابارلادىق.
