ماڭعىستاۋ وبلىسىندا جۇزگە جۋىق بالانىڭ مەكتەپ اسحاناسىنان ۋلانۋىنا قاتىستى قىلمىستىق ءىس قوزعالدى، دەپ حابارلايدى "ادىرنا" ۇلتتىق پورتالى ءبىلىم مينيسترلىگى بالالاردىڭ قۇقىقتارىن قورعاۋ كوميتەتىنىڭ ءباسپاسوز قىزمەتىنە سىلتەپ.
«قازىر وقيعا ورنىندا بالالاردىڭ قۇقىقتارىن قورعاۋ كوميتەتىنىڭ وكىلدەرى جۇمىس ىستەپ جاتىر. بالالارعا قاجەتتى مەديتسينالىق جانە پسيحولوگيالىق كومەك كورسەتىلەدى. اتالعان فاكتى بويىنشا قىلمىستىق ءىس قوزعالدى. بۇگىنگى كۇنى دارىگەرلەر 460 بالانى تەكسەرىپ، ونىڭ 377-ءسى امبۋلاتورلىق باقىلاۋعا جىبەرىلدى. وبلىستىق بالالار جۇقپالى اۋرۋلار اۋرۋحاناسىنا 83 بالا ءتۇستى. ەكەۋى جانساقتاۋ بولىمىنەن جالپى پالاتاعا اۋىستىرىلدى. مەكتەپ وقۋشىلارىنىڭ دەنساۋلىعى جاقسارىپ كەلەدى»، - دەلىنگەن دۇيسەنبى كۇنگى حاباردا.
دەرەككە سۇيەنسەك، ۇيدە باقىلاۋدا بولعان وقۋشىلاردىڭ بۇگىن مەكتەپكە بارعانى ايتىلدى.
«مەكتەپ اسحاناسى مورلەنىپ، جابىلدى. بالالار تولىق ساۋىققاننان كەيىن ولارعا قوسىمشا ساباقتار ۇيىمداستىرىلادى. قازاقستان رەسپۋبليكاسى ءبىلىم ءمينيسترىنىڭ تاپسىرماسى بويىنشا بۇگىننەن باستاپ بارلىق وبلىستار مەن قالالاردا مەكتەپتەگى تاماقتاندىرۋ بولىمشەلەرىن باقىلاۋ ءۇشىن ءموبيلدى توپتار ۇيىمداستىرىلدى. بۇل توپتار حالىقتىڭ سانيتارلىق-ەپيدەميولوگيالىق سالاۋاتتىلىعىن قامتاماسىز ەتۋ جانە تاعامنان ۋلانۋدىڭ الدىن الۋ ماقساتىندا ىستىق تاماقتىڭ ساپاسى مەن سانيتارلىق-ەپيدەميولوگيالىق تالاپتاردىڭ ساقتالۋىن قاداعالايتىن بولادى»، - دەلىنگەن حابارلامادا.
كوميتەت ونىمدەردىڭ ساپاسىنا جانە سانيتارلىق-ەپيدەميولوگيالىق نورمالارعا سايكەستىگىنە مەكتەپتەگى ازىق-تۇلىك جەتكىزۋشىلەر تىكەلەي جاۋاپتى ەكەنىن اتاپ ءوتتى.
«ءاربىر ارەكەتتىڭ ارتىندا بالالارىمىزدىڭ ءومىرى مەن دەنساۋلىعى تۇرعانىن ەستە ۇستاعان ءجون»، - دەپ قوستى كوميتەت.
ەسكە سالا كەتەيىك، بۇعان دەيىن ماڭعىستاۋ وبلىسىندا 60-قا جۋىق وقۋشىنىڭ مەكتەپ اسحاناسىنان ۋلانىپ قالعانى حابارلانعان بولاتىن. 8 قىركۇيەكتە 140-تان استام بالانىڭ زارداپ شەككەنى بەلگىلى بولدى. 9 قىركۇيەكتە ۇكىمەت بالالاردىڭ جاپپاي ۋلانۋ سەبەپتەرىن تەرگەۋدى باقىلاۋعا العانىن حابارلادى.
