Mańǵystaý oblysynda júzge jýyq balanyń mektep ashanasynan ýlanýyna qatysty qylmystyq is qozǵaldy, dep habarlaıdy "Adyrna" ulttyq portaly Bilim mınıstrligi Balalardyń quqyqtaryn qorǵaý komıtetiniń baspasóz qyzmetine siltep.
«Qazir oqıǵa ornynda Balalardyń quqyqtaryn qorǵaý komıtetiniń ókilderi jumys istep jatyr. Balalarǵa qajetti medıınalyq jáne psıhologııalyq kómek kórsetiledi. Atalǵan fakti boıynsha qylmystyq is qozǵaldy. Búgingi kúni dárigerler 460 balany tekserip, onyń 377-si ambýlatorlyq baqylaýǵa jiberildi. Oblystyq balalar juqpaly aýrýlar aýrýhanasyna 83 bala tústi. Ekeýi jansaqtaý bóliminen jalpy palataǵa aýystyryldy. Mektep oqýshylarynyń densaýlyǵy jaqsaryp keledi», - delingen dúısenbi kúngi habarda.
Derekke súıensek, úıde baqylaýda bolǵan oqýshylardyń búgin mektepke barǵany aıtyldy.
«Mektep ashanasy mórlenip, jabyldy. Balalar tolyq saýyqqannan keıin olarǵa qosymsha sabaqtar uıymdastyrylady. Qazaqstan Respýblıkasy Bilim mınıstriniń tapsyrmasy boıynsha búginnen bastap barlyq oblystar men qalalarda mekteptegi tamaqtandyrý bólimshelerin baqylaý úshin mobıldi toptar uıymdastyryldy. Bul toptar halyqtyń sanıtarlyq-epıdemıologııalyq salaýattylyǵyn qamtamasyz etý jáne taǵamnan ýlanýdyń aldyn alý maqsatynda ystyq tamaqtyń sapasy men sanıtarlyq-epıdemıologııalyq talaptardyń saqtalýyn qadaǵalaıtyn bolady», - delingen habarlamada.
Komıtet ónimderdiń sapasyna jáne sanıtarlyq-epıdemıologııalyq normalarǵa sáıkestigine mekteptegi azyq-túlik jetkizýshiler tikeleı jaýapty ekenin atap ótti.
«Árbir árekettiń artynda balalarymyzdyń ómiri men densaýlyǵy turǵanyn este ustaǵan jón», - dep qosty komıtet.
Eske sala keteıik, buǵan deıin Mańǵystaý oblysynda 60-qa jýyq oqýshynyń mektep ashanasynan ýlanyp qalǵany habarlanǵan bolatyn. 8 qyrkúıekte 140-tan astam balanyń zardap shekkeni belgili boldy. 9 qyrkúıekte úkimet balalardyń jappaı ýlaný sebepterin tergeýdi baqylaýǵa alǵanyn habarlady.
